«ПсэупIэхэмрэ къалэ зэIузэпэщыгъэмрэ» лъэпкъ проектым хиубыдэу Бахъсэн къалэм зыхуей щыхуагъэзащ Лениным и проспектымрэ Революцион- нэ уэрамымрэ тет фэтэрхэм я бжэIупэхэмрэ щIыпIэ администрацэм и хъуреягъымрэ.
«Къалэм и теплъэр егъэфIэкIуэн» лъэпкъ проектым хиубыдэу а унэ зэтетхэм я бжэIупэхэм асфальтыр щIэуэ тралъхьащ, тетIысхьэпIэхэр щагъэуващ, жэщ уэздыгъэхэр щыпагъэнащ.
Бахъсэн къалэм дэт курыт еджапIэу 6-м физикэмкIэ, химиемкIэ, биологиемкIэ дерсхэр щрагъэкIуэкI пэшхэр иджырей мардэхэм тету зыхуей щыхуагъэзащ «ЩIэныгъэ» лъэпкъ проектымкIэ. Абыхэм иджы щолажьэ щIэныгъэмрэ технологиемкIэ центрхэр. Апхуэдэ центрхэр къыщызэIуахащ Ислъэмей дэт 2-нэ, ХьэтIохъущыкъуейм дэт 2-нэ, 3-нэ, Къулъкъужын Ипщэм дэт 1-нэ, 2-нэ, Кыщпэк дэт курыт школхэм. Бахъсэн щIыналъэм и мылъкум къыхэкIыу а ухуэныгъэхэм трагъэкIуэдащ сом 1 мелуанрэ мин 800-рэ.
Къулъкъужын Ищхъэрэм гъуазджэм щыхуагъасэу сабий еджапIэм иджыри зы унэ щIэуэ къыгуащIыхьыжащ «Щэнхабзэ» лъэпкъ проектым хиубыдэу. УнэщIэм хэтщ актовэ зал ин, зытIэщIыпIэ, зыхуеину псомкIи къызэгъэпэща пэшу 8: хореографиемкIэ, макъамэмкIэ, уэрэд жыIэнымкIэ, художественнэ дерсхэмкIэ. Яубла ухуэныгъэм и фIыгъэкIэ сабийуэ школым екIуалIэм я бжыгъэм хэхъуэ зэпытщ.
ШЭРЭДЖ Дисэ.
