Къэбэрдей-Балъкъэрым мэ­лыжьыхьым и 26-м IуэхущIапIэ 78-м щатхащ Хэку зауэшхуэм  теухуа «ТекIуэныгъэм и диктант» урысейпсо тхыдэ диктантыр. Ар теухуауэ щытащ Ле­нинград къалэр щхьэхуит къызэращIыжрэ илъэс 80 зэрырикъум, ­СССР-м и гъунапкъэхэм совет зауэлI­хэр зэрикIам, фронтым щыIа тхакIуэхэм ящыщу зи юби­лейхэм, нэгъуэщIхэми. Iуэхур мы гъэм еханэу къызэрагъэпэщ.

Жэрдэмыр зейхэм я дэIэпыкъуэгъущ Урысей тхыдэ зэгу­хьэныгъэр, Урысей дзэ-тхыдэ ­зэгухьэныгъэр, «Волонтёры Победы» зэщIэхъееныгъэр, ми­нистерствэхэмрэ Iуэ­хущIапIэ щхьэ­хуэхэмрэ, уней, къэрал, жылагъуэ IуэхущIапIэхэр.
Хабзэ хъуауэ, Къэбэрдей-­Балъкъэрым и цIыхухэр дапщэ-щи жыджэру хэтщ дзэм, хэкур фIыуэ лъагъуным, тхыдэм  теухуа зэхыхьэхэм. Иджыри апхуэдащ. Iуэхум хэтащ «Урысей зэ­къуэт» политикэ ­партым и депутатхэмрэ республикэ унафэ­щI­хэмрэ. 
ЗауэлI щIыхьым и къалэу ­къа­лъыта Налшык къалэр къапщтэмэ, Бэрбэч Хь. и цIэр зезыхьэ КъБКъУ-м, КIуэкIуэ Валерэ и цIэр зезыхьэ ­КъБКъАУ-м, ГъуазджэхэмкIэ Кавказ Ищхъэрэ къэрал институтым, Урысей МВД-м Краснодар щIэныгъэм щыхагъа­хъуэу щиIэ университетым и к­ъудамэу Кавказ Ищхъэрэм щыIэм, Мэлбахъуэ Тимборэ и цIэр зезыхьэ КъБР-м и Лъэпкъ къэрал библиотекэм, Налшык къалэм и гимназие №1, №29-хэм, курыт еджапIэхэу №7, 9, 14, 25, 26, 33-хэм. Къи­нэ­мы­щIауэ, «ТекIуэныгъэм и диктантыр» Европэм и бгы нэхъ лъагэ дыдэм - Iуащхьэмахуэ, - щатхащ. 
Къэралыр къапщтэмэ, «Те­кIуэныгъэм и диктантыр» IуэхущIапIэ мин 26-м щатхащ. ­ Абы щыщу 200-р дуней псом и къэ-рал 58-м къыщызэрагъэ­пэщащ. IуэхущIапIэ 1 минрэ ­щитхум къы­зэрагъэпэщащ УФ-м Шына­гъуэншагъэмкIэ и министерствэм, МЧС-м, Урысей гвардием, МВД-м. 
Тхыдэ диктантыр зэуэ щатхащ кхъухьлъэтапIэхэм, ма­фIэгухэм, гъущI гъуэгу вок­залхэм, заповедникхэм, музейхэм, космодромхэм. Гупыж зыщI дэтхэнэми Iэмал иIащ Iуэхум хэтыну. Къи­щынэмы­щIауэ, диктантыр зэ­пэ­IэщIэу щатхащ диктантпобеды.рф сайтым и «Тестхэр» Iыхьэм. 
Iуэхум теухуа пощт маркэхэр къыдагъэкIащ икIи ахэр япэу щагъэлъэгъуащ Москва Те­кIуэныгъэм и музейм. Диктантым теухуа пощт маркхэм Iуэ­хум нэхъри зригъэубгъуну къалъытэр. 

БжьыхьэлI Розэ.
Сурэтхэр КЪАРЕЙ Элинэ трихащ.