Али Шогенцуков атлы Къабарты драма театрда эрттегили адыг жырланы устасы, Жазыучу, драматург, Къабарты-Малкъарны халкъ артисти Зарамук Кардангушев атлы фестиваль кезиулю кере бардырылгъанды. Анга келгенле фольклорчу алимни жашаууна эмда чыгъармачылыгъына жораланнган аламат сурат кёрмючге да къараргъа онг тапхандыла. Аны бла бирге уа къол усталаны сейир ишлерин да кёрюрге боллукъ эди.
Андан сора фестиваль башланады. Эрттегили халкъ жырланы айтханланы, миллет инструментлени сокъгъанланы, ариу тартыуланы бла макъамланы эшитдиргенлени, тепсегенлени да араларында республиканы эллеринден бла шахарларындан келген халкъ устала эмда атлары айтылгъан артистле бар эдиле. Ала фахмулулукълары бла къараучуланы къууандыргъандыла эмда кёллерин кётюргендиле.
Быллай байрамла эрттеден бери да бардырылмагъанлары себепли, адамла алагъа тансыкъ болгъанлары эсленип тура эди. Ала хар сахнагъа чыкъгъаннга къызыу къарсла бла ыразылыкъларын билдиргендиле. Фестивальны къурагъанла уа байрамгъа къатышханланы КъМР-ни Культура министерствосуну сыйлы грамоталары бла саугъалагъандыла.
Эсгертиу: Зарамук Патурович Кардангушев 1918 жылда Псыгансууда туугъанды. Гитчелигинден окъуна эл ишни къыйынлыгъын сынагъанды. Аны ючюн а ол къатыланмагъанды, жерге, туугъан жерине сюймеклигин ёмюрден ахырына дери жюрегинде сакълагъанды. Ма ол сюймеклик, биле-биле, халкъ чыгъармачылыкъны тинтиу ишге айланнганды. Алай бла элли жаш бурун заманладан келген жырланы, айтыуланы, нарт сёзлени, эрттегили макъамланы жыйыу бла атын айтдыргъанды.
Школда, ызы бла Ленинчи окъуу шахарчыкъда билим алгъандан сора Зарамук Москвагъа кетеди эмда ГИТИС-де окъуйду. 1940 жылда уа ол Къабарты-Малкъаргъа къайтады. Болсада Уллу Ата журт уруш аны умутларын юзеди. Жаш фронтха кетеди.
Уруш бошалгъандан сора Зарамук Патурович къабарты театргъа келип, ишлеп башлайды. Бир кесекден а къырал педагогика институтха киреди, аны бла бирге уа республикалы китап басмада редакторлукъ ишни да бардырады.
Жашаууну бек ахыр жылларында уа алим Тарыхны, филологияны эмда экономиканы Къабарты-Малкъар илму-излем институтунда ишлегенди. Ол жюзле бла халкъ жырланы, айтыуланы, жомакъланы жыйышдыргъанды. Кеси да уста жырлагъан, къыл къобузну да аламат сокъгъан Зарамук кёп халкъ жырла тас болмазына уллу къыйын салгъанды. Ала 1980-1991 жыллада «Халкъ жырла эмда эрттегили макъамла» деген тёрттомлукъ китапда басмаланнгандыла.
Холаланы Марзият.
Суратланы автор алгъанды.