Быйыл октябрьде «Прохладный – Эльхотово» жолгъа саулай 9,5 километр чакълы бирге тынгылы ремонт этилип башланнганды. Ол уллу къоранчла излеген къыйын участокга саналады. Кюн сайын аны 14 минг автомобильчи хайырланады, ол санда тыш регионладан да, деп билдиредиле КъМР-ни Транспорт эмда жол мюлк министерствосуну пресс-службасындан.
Игилендириу ишлени биринчи кесегини чеклеринде 9,5 километрде эки ыз жангыртылгъанды. Бусагъатда подряд организация жолну бирси жанын ишлеп кюрешеди. Саулай алып айтханда, белгиленнген ишлени жетмиш проценти тамамланнганды.
Ишлени кезиуюнде, къоркъуусузлукъну жалчытырча, 5 километр чакълы бетон блокладан буруу тартылгъанды. Асфальтны биринчи къаты 65 процентге салыннганды. Мурдору да 60 процентде хазыр этилгенди. Жолну къалынлыгъы 17 сантиметрге жетерча юч къат асфальт жайылады, анга саулай 70 минг тонна асфальт къоратыллыкъды.
Къыш сууукъла жууукълашханларына да къарамай, жолчула къазауат кюрешедиле. Заман болжалдан кеч къалмаз ючюн, кече-кюн демей эки смена болуп къармашадыла. Объектде жюзле бла адамла эм жюзге жууукъ энчи техника ишлейди. Тынгылы ремонт тохтаусуз барады, хар бёлюм кеси бир тюрлю жумушну тамамлайды.
Эсге сала айтсакъ, Май бла Прохладна районланы арасында трассаны Ставрополь крайдан, Шимал Осетиягъа, Ингушетиягъа эм башха Шимал-Кавказ субъектлеге баргъанла тири хайырланадыла. Жол биринчи категориялы даражаны жюрютеди, кенглиги жыйырма метрге жетеди эм тёрт ыздан къуралады.
Объектни жангы жылгъа дери бошаргъа керекдиле.
Курданланы Сулейман.