Къабарты-Малкъарны къырал бийик-тау заповедниги энчи сакъланнган жерлени жокъларгъа, кийик табийгъатны тамашалыгъы бла шагъырейлендирирге онг тапдырады. Къонакъла мындагъы жаныурланы, къанатлыланы, битимлени эм башха затланы да кёрюрча экология жолчукъла ишлейдиле. Аланы баш магъанасы жамауатны билимин ёсдюрюрге эм табийгъатха сакъ кёзден къараргъа юйретиргеди.
Жыл сайын учрежденияны келечилери волонтёрланы болушлугъу бла жаяу жолчукъланы тапландырыу жумушланы тамамлайдыла. Сёз ючюн, Огъары Бахсанда, Бызынгыда, Башилде хар кварталдан субботникле ётедиле. Быйыл участокланы барысында да тийишли белгиле эм билдириу къангала салыннгандыла. Ол санда Бызынгыны участогунда бинокль бла къараучу майдан, олтуруп солурча жер ишленнгенди, илму стационаргъа да ремонт этилгенди. Тийишли ишле Хазнидонну ызында да бардырылгъандыла. Быйылны ахырына туристле асламысы жаратхан Уштулуда да игилендириу жумушла бардырыллыкъдыла. Сагъынылгъан мадарла мындан арысында туристлени санын кёбейтирге эм табийгъатха да заран жетдирмезге себеплик этерикдиле.
Эсге сала айтсакъ, КъМР-ни къырал бийик-тау заповедниги 1976 жылда къуралгъанды. Анга Черек эм Чегем районланы 82,6 минг квадрат метр чакълы тау жерлери киредиле. Аны баш борчу табийгъатда болгъан тюрлениулени – битимлени, жаныуарланы, къанатлыланы жашау болумларын тинтиргеди эм жарыкъландырыу иш бардырыргъады.
Тогъузаланы Лейля,
КъМР-ни Бийик-тау
заповеднигини экология
эм жарыкъландырыу
бёлюмюню таматасы.