Тюнене КъМР-ни Жарыкъландырыу, илму эмда жаш тёлюню ишлери жаны бла министерствосунда ведомствону башчысы Анзор Езаов «Россейни Жылны устазы», «Россейни Жылны юйретиучюсю» эмда «Жылны мастери» деген профессионал конкурсланы регион даражалы кезиуюнде хорлагъанла эмда сагъынылгъан эришиулени битеуроссей урумунда лауреатла болгъанла бла тюбешип, аланы алгъышлагъанды эмда саугъалагъанды.
Къууанчлы жыйылыугъа дагъыда жарыкъландырыу, илму эмда жаш тёлюню ишлери жаны бла министрни орунбасары Екатерина Мисостова, ведомствону школгъа дери, орта битеулю, къошакъ эмда профессионал билим бериу управлениясыны таматасы Марина Мизова, мектепге дери эмда орта битеулю билим бериу бёлюмюню начальниги Алим Мальбахов, профессионал билим бериу бёлюмюню таматасы Оксана Мякинина, Май районну жер-жерли администрациясыны билим бериу управлениясыны башчысы Элеонора Скотаренко, колледжлени директорлары, бирсиле да келгендиле.
Жыйылгъанланы алларында сёлеше, Анзор Клишбиевич бизни устазларыбыз, юйретиучюлерибиз ючюн кёлю кётюрюлгенин айтханды. Бюгюнлюкде жаланда конкурслада хорлагъанланы эмда лауреатланы кеслерин алгъышлап къоймай, аланы педагогиканы къыйын эмда ёр жолуна тюшюндюрген, профессионал даражагъа жетиширча усталыкъны жашырынлыкъларын ангылатхан тамата тёлюге да ыспас этерге сюйгенин билдиргенди.
Жыл сайын да республиканы аты быллай къыйматлы конкурслада ахшы жанындан айтыла тургъанны магъаналы шарт болгъанын чертип, устазланы, юйретиучюлени, мастерлени барысына да мындан ары жангы жетишимле, профессионал учунуулукъ эмда илхам, саулукъ-эсенлик тежегенди. Ызы бла, пандемия болумланы эсгерте, хычыуун жумушну башлагъанды.
Эсигизге салайыкъ, бирси эришиуле къыралда эмда республикада эрттеден бери тёреге айланнганларын билебиз барыбыз да. «Жылны мастери» деген Битеуроссей конкурс а быйыл биринчи кере къуралып бардырылгъанды. Анга РФ-ни профессионал билим берген махкемелерини производстволу окъутуу жаны бла мастерлери къатышып, кеслерини хунерлерин ачыкълагъандыла.
Алай бла алгъадан жангы конкурсну юсюнден айтсакъ, аны республика даражалы кезиуюнде Къабарты-Малкъар агропромышленный колледжни мастери Оксана Анатольевна Нагудова хорлагъанды. Призёрла уа Прохладный шахардагъы кёп профильли колледжден Валентина Дмитриевна Махота (2-чи жер), Нальчикде «Къурулушчу» колледжни мастери Баллиланы Галина Алексеевна (3-чю жер), Элбрус регион колледжни келечиси Мурачаланы Лейля Абдурахмановна (3-чю жер) болгъандыла.
Барыбыз да билгенликден, быйыл «Россейни Жылны устазы-2021» конкурсну республикалы кесегинде Майский шахарны битеулю билим берген бешинчи номерли орта школунда ингилиз тилден дерсле берген Карина Арсеновна Кушхова айырмалы болгъанды. Ол бу жол къыралда эм ахшы онбеш педагогну тизмесине тюшюп, эришиуню Москвада бардырылгъан битеуроссей урумуна къатышып, аны лауреаты болгъанды.
«Россейни Жылны юйретиучюсю-2021» Битеуроссей конкурсда уа регионда биринчи жерни Прохладный шахар округну тёртюнчю номерли орта битеулю билим берген мектебини школгъа дери окъутхан жыйырма экинчи бёлюмюню юйретиучюсю Анастасия Анатольевна Ворон алгъанды. Ол а, сагъынылгъан эришиуню къырал даражалы кезиуюне Краснодарда къатышып, андан лауреат болуп къайтханды.
Бизни бла къысха ушагъында Карина Арсеновна педагогикада он жыл чакълы ишлегенин билдиргенди. Айтханына кёре, ол кеси юйюрде устазланы тёртюнчю тёлюсюню келечисиди. Конкурсха къатышханына ыразыды эмда аллай тюбешиуле педагоглагъа ала усталыкъларында эм ахшыла болгъанларын ачыкъларгъа угъай, андан ары да сынам алыргъа, бирсиле хайырланнган амалла бла шагъырейленирге эмда жангычылыкълагъа тюшюнюрге себеплик болгъанларын ангылатханды.
Мокъаланы Зухура.
Суратда: Анзор Езаов Мурачаланы Лейляны саугъалайды
