Алгъаракълада Нальчикде Тимбора Мальбахов атлы ара библиотекада 2000 жылда Сиднейде Олимпий оюнланы эки кере призёру Елена Продунованы ата-анадан ёксюз къалгъан сабийле бла тюбешиую болгъанды. Аны шахарны жер-жерли администрациясыны таматасыны орунбасары Атмырзаланы Земфираны башламчылыгъы бла опека эм попечитель бёлюмю къурагъанды.
Олимпий оюнланы чемпиону Елена Продунова бусагъатда спорт гимнастикадан сабийлеге жарау этдиреди. Ол сабийлеге кесини жашау ызыны эмда аллай бийик жетишимлеге къалай бла келгенини юсюнден толу хапар айтханды. Тюбешиуню ахырында спортчу къыз жыйылгъанланы сорууларына тынгылы жууапла бергенди эм, аланы арасында сюйген болса жарау этерге кесине чакъыргъанды.
«Быллай спортчула бла тюбешиуле хар бир сабийге да бек сейир кёрюнеди, аны юйретиу жаны бла хайыры да уллуду. Мен ангылагъандан, аны юлгюсю жаш адамлагъа дерсди. Ётюрюкден не асыу, пандемия башланнганлы бери биз быллай тюбешиулени терк-терк бардыралмайбыз. Алагъа да кёп адамны жыяргъа къоркъгъан этебиз. Хал былай болуп турмазына да бек ышанабыз», - дегенди Атмырзаланы Земфира бизни бла ушагъыны ахырында.
Бизни корр.
