Озгъан баш кюн В.М.Коков атлы Къабарты-Малкъар къырал аграр университетде КъМР-ни жаш депутатларыны «Къабарты-Малкъар Республиканы айныуунда жаш тёлюню жери» деген ат бла республикалы форуму ишин башлагъанды.
Тюбешиу башланырдан алгъа КъМКъАУ-ну студентлерини профсоюз организациясыны председатели, КъМР-ни Парламентини Жаш тёлю палатасыны санына кирген Забакъланы Азамат, ол бу ишни башламчыларындан бириди, чертип айтханнга кёре, форумну баш магъанасы – жаш депутатланы профессионал усталыкъларын кётюрюу эмда сынау юлюшлю болуу эди.
Биринчи номерли жаш тёлю майданда сёз «Элни айнытыуда жаш тёлюню магъанасы» деген темагъа баргъанды. Анда бек алгъа экспертле – КъМР-ни Правительствосуну Председателини биринчи орунбасары Сергей Говоров, КъМР-ни Парламентини Аграр соруула, табийгъатны хайырланыу, экология эмда тёгерекде къудуретни сакълау жаны бла комитетни председатели Артур Текушев, Къабарты-Малкъар къырал аграр университетни ректоруну юйретиу иш эмда социал соруула жаны бла орунбасары Ауэс Кумыков сёлешгендиле.
«Элни айнытыуну юсюнден сёз баргъаны, ол бек магъаналыды, нек дегенде элли жерледе республикада адамланы къыркъ сегиз проценти жашайды»,- деп белгилегенди Сергей Анатольевич . Дагъыда ол чертгеннге кёре, элде бизнесни айнытыудан сора да, социал вопросланы тамамлау да магъаналыды, нек дегенде анда жашау шахардан эсе осал болургъа керек тюйюлдю.
Сергей Говоров белгилегеннге кёре, бусагъатда элни айнытыугъа бурулгъан кёп программала ишлейдиле, ал атламла эте башлагъан фермерлеге деп да аслам жангычылыкъ эсге алыннганды, ол затла уа республиканы жеринде жангы бизнесменлени аслам болууларына ала кеслерини ишлерин къурауларына себеплик этедиле.
Артур Текушев чертгеннге кёре, жаш тёлюню магъанасы бусагъатда ёсе барады, КъМР-де экономиканы айнытыуну баш жолларындан бири уа – эл мюлк бла байламлыды. Ол белгилегенича, келир жыл республиканы бюджетинден эл мюлкню айнытыугъа эки миллиард 800 миллион сом бёлюнюрюкдю. Андан сора да, бюгюнлюкде эм баш вопросладан бири-элде жаш тёлю политикады.
Ауэс Кумыков а элде ишлерге кадрла хазырлагъанларыны юсюнден айтханды. «КъМКъАУ-да 110 программа, 40 тюрлю усталыкъны юсю бла тёрт минг студент билим алады. Бийик окъуу юйню бошап чыкъгъанланы, окъуй тургъан студентлени да иш бла къалай жалчытылгъанларыны юсюнден айтханды. «Бизни экинчи курсда окъугъан студентлерибизни окъуна да ишге чакъырадыла. Алай бла 128 организация бла келишим да этгенбиз. Элни жашауу бла байламлы ишлеген жууаплы бёлюмле бла къаты байламлыкъда турургъа керекбиз»,-деп белгилегенди проректор.
Тюбешиуню ахырында форумгъа къатышханла, жаш депутатла да экспертлеге соруула бергендиле, тынгылы жууапла да эшитгендиле. Ызы бла «Социальное проектирование, как вид проявления молодёжи в селе» деген мастер- класс- тренинг болгъанды, биринчи номерли дискуссиялы майданны ишини эсеплери да сюзюлгендиле.
Форум ишин 26 ноябрьге дери бардырлыкъды. Анда жаш тёлю дискуссиялы майданлада «Жаш тёлю предпринимательлик, жаш адамланы иш бла жалчытыу», «Информациялы проектле жаш тёлю политиканы баш магъаналы кесеклери», «Жаш тёлюню республикада спортну, туризмни эмда курортну айнытыуда магъанасы», «КъМР-де билим бериуню айнытыуну закон бла жалчытыу», «Коммерциялы болмагъан организацияланы жаш тёлю секторун айнытыу», «КъМР-ни жаш депутатларыны законла чыгъарыуда магъаналары», «КъМР-де саулукъ сакълауну, социал вопросланы эмда саулукълу жашауну бардырыуну айнытыуда жаш адамланы магъаналары» , «Миллетлени маданиятларын кётюрюу жаны бла жаш тёлю проектлеге себеплик этиу» эмда «Шахарны айнытыуда жаш адамланы магъаналары» деген темала бла байламлы ишлерикдиле.
Холаланы Марзият.
Суратланы автор
алгъанды.
