Бу кюнледе «Къабарты-Малкъар Республиканы айныуунда жаш тёлюню жери» деген форум барады. Аны КъМР-ни Парламентини Билим бериу, илму эм жаш тёлюню ишлери жаны бла комитети эмда Парламентде Жаш тёлю палата къурагъандыла. Форумгъа талай ведомстволаны эмда башха регионланы келечилери, сора жаш депутатла къатышадыла. Бу ишни чеклеринде жыйылыула, тюбешиуле, ушакъла бардырыладыла, жаш адамла эмда экспертле ол неда бу темала бла байламлы оюмларын туура этедиле.
Тюнене «КъМР-ни жаш депутатларыны ишлеринде законла чыгъарыуну магъанасы» деген темагъа жыйылыу болгъанды. Анга Парламентни Председателини орунбасары Жанатайланы Салим, сагъынылгъан комитетни башчысы Нина Емузова, Нальчик шахар округну жер-жерли самоуправлениясыны советини депутаты Екатерина Суркова эм башхала къатышхандыла.
Ал сёзюнде Жанатайланы Салим законла чыгъарыугъа жаш тёлю да тири къатышса иги боллугъун белгилегенди. «Ол бек магъаналы темады. Ёсюп келген тёлюню бюгюннгю жарсыуларын, излемлерин, сейирлерин жаш адамладан иги ким биледи? Республиканы, саулай къыралны да тамблагъы кюню сизни къолугъуздады. Жаш тёлю туугъан элиме, журтума хайыр келтирейим деген хыйсап бла политикагъа баргъаны да иги шартды. Сизни кёбюгюз волонтёрлукъ бла кюрешгенигизни да билеме - ол да къууандырады. Бу къыйын кезиуледе врачлагъа, саусузлагъа, абаданлагъа болушасыз, аперим», - деп, Парламентни Председателини орунбасары жаш депутатлагъа бийик жетишимле тежегенди.
Нина Емузова да форум баргъан кюнледе кёп магъаналы оюмла эшитгенин айтып, аллай ахшы башламчылыкълагъа не бла да болушлукъ этерге хазыр болгъанын чертгенди. «Властьха жаш тёлю келгени игиди, алай ол анда кесин къалай кёргюзтюрюгю уа магъаналы сорууду. Власть - ол жаланда даража угъай, жууаплылыкъды, адамланы сейирлерин жалчытыуду», - деп къошханды.
Форумгъа видеоконференция связь халда башха регионладан да къатышхандыла. Владикавказ шахарны келечилерини Жыйылыууну депутаты Павел Битаров жаш адамланы арасында правогъа бузукълукъ этиуню профилактикасыны юсюнден сёлешгенди. Бу жаны бла къырал политика къалай бардырылгъанын, ёсе келген тёлю осал къылыкълагъа, наркотиклеге, ичгиге алданмазча не зат этерге кереклисин айтханды. Тийишли законодательство башламчылыкъны юсюнден хапарлап, башха регионлада парламентарийледен да болушлукъ изленнгенин чертгенди. Форумгъа къатышхан жаш депутатланы уа тири, къармашыулу болургъа чакъырып, тутхан ишлеринде жетишимле тежегенди.
Санкт-Петербургда Измайловское муниципал округну депутаты Дмитрий Бубнов шёндюгю дунияда жаш адамланы кёз къарамларын, сагъышларын, ич дунияларын къурауда Интернет уллу жерни алгъаныны юсюнден хапарлагъанды. «Социал сетьлени, башха платформаланы да жаланда хайыры болмаса, хатасы жокъду деп айтырча тюйюлдю. Ёсе келген тёлюге алада терс сагъышла, къаугъалы къылыкъла сингдирирге боллукъдула. Аны себепли тыш къыраллада жарашдырылгъан быллай платформалагъа уллу эс бурургъа, игиси уа – алача проектлени кесибизде тамамларгъа керекди», - дегенди ол. Дагъыда Къабарты-Малкъарда жаш адамла Интернетде заманларын къалай бла ётдюргенлерин тинтирге чакъыргъанды, жаш депутатлагъа уа адамла бла ачыкъ сёлеширге къоркъмагъыз, аланы жарсыуларына къулакъ сала билигиз, ишлеригизни юсюнден да айтыргъа юйренигиз, дегенди.
Ставрополь крайны Думасыны депутаты Аркадий Торосян регионда жаш депутатла не бла кюрешгенлерини юсюнден билдиргенди. Ол крайда парламентаризмни школу ишлейди да, анда къаллай билим бериу программала болгъанын да туура этгенди. «Биз аланы магъаналыгъа санайбыз, башха регионлада сингдирсе иги болур дейбиз. Тийишли сынамыбыз бла Къабарты-Малкъардан коллегаларыбызны да шагъырейлендирирге хазырбыз», - деп чертгенди.
Форумгъа РФ-ни Къырал Думасыны депутаты Екатерина Стенякина да къатышхан эди. «Жаш депутатланы биригиую ол жамауатны жумушларын тамамларгъа къолларындан келген жаш профессионалланы биригиуюдю. Адамла айтханларына къулакъ сала билигиз, аланы жарсыуларына эс буругъуз. Энчи бир ишде болушургъа къолугъуздан келмесе да, ким биледи, артда тийишли законда бир сёзню тюрлендирип, минглени аллай жарсыуларын тамамларгъа да болурсуз», - дегени ол. Жанатайланы Салим а депутат тынгылай билгенден сора да, ишни къалай тындырыргъа боллугъуна къарамын туура этерге керекди, деп къошханды.
Жыйылыуда жаш адамла бла кёп тюрлю темаланы юсюнден ушакъ баргъанды. Ала экологияны, табийгъатны сакълауну юсюнден да хапарлагъандыла, тамата коллегаларын тийишли башламчылыкълары бла шагъырейлендиргендиле.
Улбашланы Мурат
