Къабарты-Малкъарда жашагъанла, бирси регионладача, вакцина этилгенине QR-коду бла  къагъыт сертификатны энди Къырал эм муниципал жумушланы тамамлагъан кёп функциялы арада (МФЦ) алыргъа боллукъдула. 

Биринчи кюнде окъуна ол  жюз адамдан асламгъа берилгенди.  Сертификатны  прививканы ётгенле, ауругъанла эм  медицина  жаны бла вакцинаны этдирирге жарамагъанла алаллыкъдыла. Вакцина этилгеннге  ол бир жылгъа, ауругъанлагъа алты айгъа бериледи. Аны бир тюрлю сылтау бла салдырыргъа жарамагъанлагъа уа кёрюмдюлери федерал реестрге  кийирилген справка бла жалчытылынадыла.  

Кёп функциялы араны специалистлери айтханнга кёре, къагъыт тюрлю документ кёбюсюнде смартфонла  бла кюреше билмеген  абаданлагъа керек болады. Аны алыр ючюн адамны биргесине  паспорт, СНИЛС, борчлу халда медицина страхование этиу полис болургъа тийишлиди. Тыш къырал  паспорту болгъанлагъа ол  ингилиз тилде да бериледи.

Магометланы Сулейман.