Урысейм и Правительствэм Бахъсэн Iуфэм Iус жылагъуэхэр псыкIэ къызэгъэпэщыным трагъэкIуэдэн папщIэ сом мелардитIым щIигъу къиутIыпщынущ. Абы теухуа заяв-кэр махуитI япэкIэ Москва щыпхигъэкIащ КъБР-м и Iэтащхьэ КIуэкIуэ Казбек. Правительствэм щIыналъэ зыужьыныгъэмкIэ и комиссэм и зэIущIэм, УФ-м и Правительствэм и УнафэщIым и къуэдзэ Хуснуллин Марат жэпуэгъуэм и 21-м иригъэкIуэкIам, щыдаIыгъащ километр 77-рэ зи кIыхьагъ бжьамий псы жапIэ Бахъсэн районым щыухуэнымкIэ инфраструктурэ проект иныр икIи абы папщIэ федеральнэ бюджетым и бюджет кредиту сом мелард 2,1-рэ КъБР-м хухэхыныр. Мы проектыр 2022-2023 гъэхэм къриубыдэу ягъэзэщIэн хуейщ икIи абы псори зэхэту сом меларди 2,6-рэ текIуэдэнущ.
Республикэм и Iэтащхьэм зэIущIэм къыщыхигъэщхьэхукIащ мы инфраструктурэ проектыр гъэзэщIэным и фIыщIэкIэ зэуэ мыхьэнэшхуэ зиIэ IуэхуитI зэрыдагъэкIынур. Япэр-Бахъсэн къалэм, Зеикъуэ, ХьэтIохъущыкъуей, Ислъэмей, Бахъсэненкэ, ПсыкIэху къуажэхэм дэсхэр зэфэн псы къабзэкIэ зэблэу къыхэмыкIыу къызэгъэпэщынырщ, яубрыуауэ щыта псы къыщIэшыпIэхэр зэрагъэбыдэжым и фIыщIэкIэ псым и уасэр гъэмщIэныр. Псым и лъэныкъуэкIэ зи Iуэхур ефIэкIуэнухэр цIыху мин 98-м ноблагъэ.
ЕтIуанэ- Бахъсэн къалэмрэ Бахъсэн районымрэ псэупIэхэр ухуэным ехьэлIа инвестицэ проектыщIэр щыгъэзэщIэныр. А проектым ипкъ иткIэ мы муниципалитетхэм 2038 гъэм нэсыху псэупIэу метр зэбгъузэнатIэ мин 260-м щIигъу щаухуэну я мурадщ. ЩIыналъэр тэмэму дэIэпыкъумэ, инвесто-рым езым и ахъшэу сом меларди 6,8-рэ къызэщIигъэуIуэну хьэзырщ. А псоми къадэкIуэу, проектыр зэрагъэзэщIэнум и фIыщIэкIэ республикэм и бюджет зэгуэтым къыIэрыхьэ налог ахъшэр нэхъыбэ хъунущ, апхуэдэу лэжьапIэ IэнатIэщIэу 240-рэ хуэдиз къызэIуахынущ.
Правительствэм и комиссэм Къэбэрдей-Балъкъэрым къыбгъэдэкI заявкэр къыдиIыгъащ. «Къэбэрдей-Балъкъэр Республикэм кредиту сом мелар- ди 2,1-рэ хухах. Ахъшэр трагъэкIуэдэ- нущ Бахъсэн бжьамий псы жапIэ щIыным. А проектым и фIыщIэкIэ зэхуащIыжынущ электрокъарууэ куэд зыгъэкуэщI псы къыщIэшыпIэхэр икIи, федеральнэ проектым къызэрыщыгъэлъэгъуам тету, а щIыналъэм щыпсэухэр псы къабзэкIэ къызэрагъэпэщынущ»,-жиIащ вице-премьер Хуснуллин Марат.
«НобэкIэ инфраструктурэ бюджет кредиту сом меларди 440-рэ зыхуэзэ щIыналъэ заявкэу 8-м дыхэплъащ икIи ахэр къэтщтащ. Зэман благъэм къриубыдэу тегуэшэн дыухынущ кредитымкIэ ягъэува мардэр-сом мелард 50-р. Апхуэдэу щыщыткIэ, ди программэм ипкъ иткIэ къэралым и щIыналъэхэм 2023 гъэм фIэмыкIыу IэмалыщIэхэр ягъуэтынущ социально-экономикэ зыужьыныгъэм хуэунэтIа проектхэр гъэзэщIэнымкIэ IэмалыщIэхэр, - жиIащ зэIущIэм и кIэухым Хуснуллин Марат.
Иджыпсту щIэгъэхуэбжьауэ зэхалъ-хьэ Бахъсэн бжьамий псы жапIэм и проект-сметэ документхэр икIи ахэр илъэсым и кIэухым фIэмыкIыу пхагъэкIыну я мурадщ.
Ди республикэр инфраструктурэ кредитхэр къеIыхынымкIэ программэм хагъэхьащ щIыналъэм къэрал щIыхуэр нэрылъагъуу зэригъэмэщIам, коммерческэ щIыхуэхэр зэрипшыныжам къыхэкIыу.
КъБР-м и Iэтащхьэмрэ Правительствэмрэ я пресс-IуэхущIапIэ.