Къабарты-Малкъарда энди жамауатха коронавирусха къажау вакцинаны битеу да ара район больницалада эмда амбулаториялада да салып тебирегендиле. Биз а аны бла байламлы жумуш Нальчикни биринчи номерли поликлиникасында къалай къуралгъанын билирге излеп, ары баргъанбыз. Эсигизге салайыкъ, бу медицина махкеме республикада эм алгъа къуралгъан пунктланы ючюсюнден бири болгъанды.
Аны таматасы КъМР-ни сыйлы врачы Аулият Каскулова билдиргеннге кёре, инсанлагъа аслам халда иммунизация этиу мында алтынчы январьдан башланнганды. Ол кюн дарман он адамгъа салыннганды. Жетинчисинде да анча инсаннга вакцинаны этгендиле. Ызы бла келгенлени саны кёбейе, бек уллу тарих бир кюнню ичине алтмыш адамгъа дери окъуна жетгенди.
Алай бла поликлиникагъа эндиге дери «Гам-Ковид-Вакны» 500 дозасы келтирилгенди эмда ала барысы да хайырланылгъандыла. Тюнене уа ол инсанлагъа дарманны экинчи кесегин салып да (ревакцинация) тебирегендиле. Бери да адамла алгъын къалай келген эселе да, ол санда келликдиле. Сёз ючюн, алтынчы январьда оноуланнга этилген эсе вакцина, жыйырма жетинчисинде да дарман алагъа салынырыкъды.
Иммунизацияны биринчи кесегин ётгенден сора 21 кюн озаргъа тийишлиди. Вакцина инсанны кеси ыразылыгъына кёре этиледи. Бери поликлиникагъа келгенлени жыл санлары онсегизден сексен бешге дери окъуна жетгенди. Дарманны салдырыргъа сюйгенле эм алгъа кеслерини участка терапевтлерине барадыла эмда андан эркинлик аладыла. Юслеринден кетмеген ауруулары болмагъанлагъа ол тыйгъычсыз этиледи.
Иммунизациягъа барыргъа излегенлени, андан тышында да, къырал жумушланы порталыны, колл-центрлени, электрон регистратураны болушлукълары бла анга жазылыргъа онглары барды. Дагъыда поликлиниканы прививкаланы этген кабинетине 42-29-92 телефон номерге тюзюнлей сёлешип къояргъа жарарыкъды. Адам кесине тап заманны сайларгъа да боллукъду.
Шахарны бу поликлиникасында, аны филиалын да алып айтсакъ (Вольный Аулда), иммунизацияны бардыргъан эки кабинет ишлейди. Бу жумушха жууаплыла врачла-терапевтле Гыжгыланы Разият бла Мамайланы Людмила эмда медсестрала Гайыланы Танзиля бла Чыгырланы Людмиладыла. Бери вакциналагъа деп, бузлатыучу камерала, термоконтейнерле да алыннгандыла. Дагъыда коллективлени кеслерине барып, прививканы алай этерча бригадала да къуралгъандыла. Барысы да бу жаны бла билимлерин да ёсдюргендиле.
Инсаннга дарман салыннгандан сора ол бир жарым сагъатны поликлиникада туруп, аны халына къаралады. Сора юч кюнню ичинде прививка этилген жерге суу тийдирирге, хамамгъа барыргъа, алкоголю болгъан зат ичерге жарамайды. Бир-эки кюнню уа бу адамланы сингирлери, башлары аурутханларын, къарыусузлукъларын, къызыулукълары бир кесек кётюрюлгенлерин айтхандыла. Болсада ол ышанла артда кетедиле. Бу медицина махкемеде вакцинаны этдиргенледен артда осложнениясы болгъан чыкъмагъанды.
Иммунизацияны эки кесегин да ётгенлеге сертификатла берилликдиле. Аланы атларын врач «Гам-Ковид-Вак» вакцинаны салдыргъанланы федерал регистр эсеплерине кийиреди. Ревакцинациядан сора 42 кюн озса, инсанла антителалагъа анализни да ётерге боллукъдула. Дарман салыннганлагъа ала кеслерин къалай жюрютюрге тийишлиси бла байламлы эсгертиуле, врачны телефону да бериледиле.
Белгилегенибизча, поликлиника эм алгъа ачылгъан иммунизация пунктладан бириди. Вакцинаны этдирирге бери эрттенликде сегизден ингирде онсегиз сагъатха дери келирге боллукъду. Мында, биринчиден, дарманны медицинада, социал сферада, билим бериуде ишлегенлеге салгъандыла. Энди уа жамауат аслам халда келип башлагъанды.
Иммунизация сау жылны бардырыллыкъды деп белгиленеди эмда энчи бу поликлиникада быйылны ахырына дери 24 минг бла беш жюз доза хайырланыллыкъды. Бу кюнледе, айтханыбызча, энди бир-бирле ревакцинацияны ётедиле.
Мында болгъаныбызда, биз Залина бла да къысха ушакъ этгенбиз. Ол тукъумун жазмазыбызны тилегенди. Аланы юйюрлери дарманны барысы да (алтаулан боладыла) салдыргъандыла. Эм алгъа уа тиширыу баш иеси бла бирге келгенди.
Ол биринчи кеслери кёрюп, бирсиле бла байламлы оноуну алай этерге келишгенлерин да айтады. Кесини юсюнден кетмеген ауруулары болгъаны себепли эм алгъа жюрек-къан тамырла жаны бла хирургга барып, андан эркинлик да алгъанды. Вакцинацияны этдиргенден сора бир-эки кюнню къызыулугъу кётюрюлюп, сингирлери да аурутханын билдиргенди.
Бир ненча кюнден а ол атасын (анга 82 жыл болады), анасын да келтиргенди поликлиникагъа. Къартны температурасы бир кесек бийик болгъанды, ансы тиширыу а дарманны женгил кётюргенди. Мени ушакъ нёгерим ата-анасы аны хайыры бла вирусдан аурумай, кёп жылланы саулукълу жашарларына ийнанады.
Кеси уа эм алгъа жарсып, бир кесек къоркъуп баргъанын да жашырмайды. Алай а эндиге дери да Россей кёмеден, бирси аурууладан да вакцинала жарашдырып тургъанын, аланы къыйматлылыкъларын да эсгертеди. Дагъыда адамла жаланда кеслери ючюн угъай, жууукъ-ахлулары, сабийлери ючюн да сагъышланыргъа керек болгъанларын айтады.
Белгиленнгенича, коронавирусдан коллектив иммунитет чыгъар ючюн жамауатны алтмыш процентине иммунизация этер план барды. Биз кёргенден эмда ангылагъандан, сагъынылгъан медицина махкемеде ол къуралыулу барады.
