Кёп болмай Чегем муниципал районну администрациясыны башчысы Юра Борсов коронавирусдан вакцинация этиу жаны бла оператив штабны кенгешин ётдюргенди. Анга КъМР-ни Саулукъ сакълау министерствосуну, Роспотребнадзорну, ара больницаны, эллени, организацияланы бла учрежденияланы таматалары да къатышхандыла. Аны юсюнден жер-жерли администрацияны пресс-службасындан билдиргендиле.
Тюбешиуде бюгюнлюкде кесин ахшы жаны бла кёргюзтген эмда къоркъуусузгъа саналгъан Гам-Ковид-Вак «Спутник-V» препарат хайырланырыгъы билдирилгенди. Бусагъатда ол эки толкъун бла 1,5 минг адамгъа этилгенди. Аны Чегем шахарны ара больницасында, Нартан, Шалушка эм Экинчи Чегем элни поликлиникаларында этдирирге боллукъду. Вакцинацияны биринчи врачла, устазла, социал эм къырал учреждениялада ишлегенле, сатыу-алыу эм аш-азыкъ хазырлагъан бёлюмледе къармашханла ётедиле.
Бюгюнлюкде республикада эпидемиология болум мардадан чыкъмагъанлай сакъланады, болсада специалистле айтханнга кёре, ол не заманда осал жанына тюрленип къалыргъа боллукъду. Жыйылыуда прививкаланы салдыргъанла иммунитетлерин кючлегенлери бла бирге тири жашау бардырыргъа онг табарыкълары да эсгертилгенди.