КъБР-м и Iэтащхьэ КIуэкIуэ Казбек щIышылэм и 19-м Пятигорск къалэм лэжьыгъэ IуэхукIэ щыIущIащ Урысей Федерацэм и Президентым и полномочнэ лIыкIуэу КИФЩI-м щыIэ Чайкэ Юрий.
Чайкэ Юрийрэ КIуэкIуэ Казбекрэ тепсэлъыхьащ гъэ кIуам кърикIуахэм, дызыхыхьа илъэсым, Урысейм и Президентым пщэрылъ къащищIахэм тету, щIыналъэм социально-экономикэ, жылагъуэ-политикэ я лъэныкъуэкIэ зэрызиужьыну щIыкIэм.
Апхуэдэуи хэплъащ лъэпкъ проектхэмрэ къэрал программэхэмрэ къыщыгъэлъэгъуахэр 2020 гъэм гъэзэщIа зэрыхъуам, илъэсыщIэм къапэщыт къалэнхэм. Къыхагъэщащ зи гугъу ящI унэтIыныгъэхэмкIэ республикэр «щIыналъэ щхъуантIэ» жыхуаIэ щIыпIэхэм зэрыхабжар - къалэн нэхъыщхьэхэр процентищэкIэ зыгъэзэщIахэм зэрахэтыр.
Гулъытэ хэха хуащIащ республикэм узыншагъэр хъумэнымкIэ и IэнатIэм, санитар-эпидемиологие щытыкIэм ехьэлIа Iуэхухэм. Абы теухуауэ КIуэкIуэ Казбек къыхигъэщащ узыншагъэр хъумэнымкIэ IэнатIэр зэрыщыту, абы сымаджэм япэу зызыхуигъазэ IуэхущIапIэхэри яхэту, егъэфIэкIуэным мыхьэнэшхуэ зэриIэр.
И гугъу ящIащ щIыналъэм лышх узыфэм щыпэщIэт центрыщIэ щыухэнымкIэ щыIэ хэкIыпIэхэм. Иджыпсту хоплъэ а ухуэныгъэм текIуэдэну мылъкур УФ-м и инвестицэ программэм хэгъэхьэным ехьэлIауэ щыIэ Iэмалхэм. КъБР-м и Iэтащхьэм полномочнэ лIыкIуэм лъэIукIэ зыхуигъэзащ щIыналъэм дежкIэ мыхьэнэшхуэ зиIэ а Iуэхур зэфIэгъэкIынымкIэ щIэгъэкъуэн къыхуэхъуну.
Республикэм щыщыIэ санитар-эпидемиологие щытыкIэр щызэпкърахым КIуэкIуэ Казбек къыхигъэщащ, гугъуехьхэм емылъытауэ, республикэм узыншагъэр хъумэнымкIэ и IэнатIэр и къалэнхэр гъэзэщIэным зэрыпэлъэщыр. ГъуэлъыпIэ лейуэ яIэщ процент 20 хуэдиз. Госпиталхэм ИВЛ Iэмэпсымэхэр, хущхъуэхэр, лэжьакIуэхэр къаймэщIэкIыркъым. Узыфэ зэрыцIалэ нэхъ шынагъуэхэр зыпкърытхэр щагъэхъуж сымаджэщхэмрэ лабораторэхэмрэ медицинэ Iэмэпсымэу, абы технологие лъагэр и лъабжьэу ящIахэри яхэту, 1500-рэ хурагъэшащ.
Коронавирус узыфэ зэрыцIалэр зыпкърыт сымаджэхэм я деж щIыпIэм егъэбыдылIа дохутырхэр нагъэсын папщIэ поликлиникэхэм автомобиль тхущI хуэдиз иратащ, COVID-р зэфыкIхэм амбулаторнэ дэIэпыкъуныгъэ щрат центрих къызэрагъэпэщащ.
КIуэкIуэ Казбек къыхигъэщащ коронавирус зыпкърытхэу амбулаторнэу ягъэхъуж сымаджэхэр хущхъуэкIэ къызэгъэпэщыным гулъытэ щхьэхуэ зэрыхуащIыр: 2020 гъэмрэ мы илъэсым и щIышылэмрэ къриубыдэу хущхъуэхэр къэщэхуным республикэ бюджетым щыщу трагъэкIуэдащ сом мелуан 45-рэ, федеральнэ бюджетым щыщу къаIэрыхьащ сом мелуан 51-рэ.
Медицинэ IуэхущIапIэхэм (госпиталхэм) я лэжьыгъэр щызэблэу къэмыхъуу екIуэкIыным хуаутIыпщащ сом меларди 2,8-рэ, абы щыщу сом 1 мелардыр республикэм бюджетым къыхэкIащ.
«Урысейм и Президентым къалэн къазэрыщищIам тету республикэм щыщIадзащ коронавирус узыфэм щызыхъумэ мастэхэр цIыхухэм яхэлъхьэным, - къыхигъэщхьэхукIащ КIуэкIуэ Казбек. – Вакцинэр цIыху 1342-м хаIуащ, дыгъуасэ мастэ 1400-рэ къаIэрыхьащ. Нобэ къыщыщIэдзауэ мастэхэр цIыхухэм щыхалъхьэ республикэм и муниципальнэ зэгухьэныгъэхэм я щIыналъэ сымаджэщ нэхъыщхьэхэмрэ амбулаторэхэмрэ». Чайкэ Юрий къалэну къигъэуващ республикэм щыпсэухэм мастэр яхэлъхьэным хуэунэтIа лэжьыгъэр псынщIэу зэтраухуэу тэмэму ирагъэкIуэкIыну.
КъБР-м и Iэтащхьэ КIуэкIуэ Казбек Чайкэ Юрий ехъуэхъуащ Кавказ Ищхъэрэ федеральнэ щIыналъэр къызэрызэрагъэпэщрэ илъэс 11 зэрырикъумкIэ икIи къыхигъэщащ а зэманым Урысейм и Президентым и полномочнэ лIыкIуэм и Аппаратыр Кавказ Ищхъэрэ щIыналъэхэм я зэкъуэтыныгъэм и джэлэсу зэрыувар икIи федеральнэ щIыналъэм хыхьэ хэкухэм я зэкъуэтыныгъэр, жылагъуэ, экономикэ зэпыщIэныгъэхэр гъэбыдэным хуэгъэза къалэнхэм хъарзынэу зэрехъулIэр.