КъМР-ни Башчысы Казбек Коков «Единая Россияны» Экинчи социал онлайн-форумуна къатышханды, аны ишине партияны битеу волонтёр аралары къошулгъандыла. Партияны председатели Дмитрий Медведев коронавирус жукъгъан аурууну пандемиясыны кезиуюнде волонтёрланы ишлерини эсеплерин чыгъаргъанды, кесини магъаналылыгъын эм изленнгенин кёргюзтген волонтёр къымылдаугъа регионланы мындан аысында билеклик этип турургъа чакъыргъанды.
«Тамамланнган мадарла эсеплерин кёргюзтгендиле, алай тынчайыргъа алыкъа эрттеди. Аны себепли биз битеу кючюбюзню эм къолайлыгъыбызны адамлагъа болушлукъгъа жиберебиз»,- дегенди Дмитрий Медведев. Ол партияны битеу волонтёрларына эм алчыларына байламлыкъда ишлегенлери ючюн ыразылыгъын айтханды.
Къабарты-Малкъарда пандемия башланнганлы бери жюзле бла волонтёрла болушлукъ излегенлеге табылгъандыла: абаданлагъа аш-азыкъ хуржунла, дарманла элтгендиле, госпитальлада уруннган медицина ишчилеге аш-азыкъ жетдиргендиле. Республикада 122 «исси ыз» къуралгъанды, аны ишине ординаторла – Х.М. Бербеков атлы Къабарты-Малкъар къырал университетни медицина факультетини  волонтёрлары, КъМР-ни Саулукъ сакълау министерствосуну Медицина консультация-диагностика арасыны телемедицина бёлюмюню келечилери да къошулгъандыла.
Форумну ишини чегинде Казбек Коков Къабарты-Малкъар Республикада волонтёр къымылдауну айныууна кеслери ыразылыкълары бла ишлегенлери магъаналы къошумчулукъ этген эм тири волонтёрлагъа саугъала бергенди. Алай бла «#МыВместе» бир бирге болушлукъ этиу Битеуроссей акцияны къурагъанда халал жюрекден кюрешгенлеге деп берилген эсде къаллыкъ майдаллагъа РФ-ни Президентини грамоталары волонтёрла Казбулат Доховха, Текуланы Исламгъа эм Эрик Хаповха тутдурулгъандыла. РФ-ни Президенти В. Путинни  ыразылыкъ къагъытына «Единая Россияны» «Молодая гвардиясыны» таматасы Альбек Абазов тийишли кёрюлгенди, «Единая Россия» партияны председатели Д. Медведевни ыразылыкъ къагъытын  волонтёр Хасанби Абазов алгъанды, «Единая Россия» партияны Генеральный советини Президиумуну Гражданланы обращениялары жаны бла комиссиясыны ыразылыгъына партияны регион жамауат приёмныйинде гражданланы обращениялары бла ишлеген координатор – «Единая Россияны» волонтёр арасыны  таматасыны орунбасары  Руслан Макушев тийишли болгъанды.