Къабарты-Малкъарда Коронавирус инфекциядан сакъланыу эмда аны жайылыууна контроль этиу жаны бла оператив штабны шартларына кёре, 27 августха республикада коронавирусдан ауругъанланы битеу саны 6439 адамгъа жетгенди. Ахыр сутканы ичинде 22 адам ауругъаны ачыкъланнганды.
Насыпха ёлген болмагъанды. 16 саусуз а, ауруудан къутулуп,больницадан чыкъгъанды. Аллайла битеу да 6043 болгъандыла.
Шимал-Кавказ федерал округну регионларыны юсюнден айтханда, «Стопкоронавирус.рф». сайтда билдирилгенича, бир суткагъа 311 адам ауругъаны ачыкъланнганды. Ставрополь крайда аллайла барысындан да кёпдюле – 125, Чечен Республикада уа барысындан да аздыла – 4. Пандемия башланнганлы уа округда битеу ауругъанланы саны 45228 болгъанды. Ёлгенле уа 1005-ге жетгендиле.
Россейде коронавирус жукъгъанла бир сутканы ичинде 4829 болгъандыла, 5 905 саусуз а сау болуп чыкъгъанды. Къыралда бу жангы ауруудан ауругъанланы битеу саны 980,4 мингнге, сау болгъанла уа 798 466-гъа жетгендиле.
Бир сутканы ичинде Россейде 110 саусуз ауушханды, пандемия башланнганлы уа - 16 914.
Роспотребнадзорну башчысы Анна Попова Россейде коронавирус инфекцияны жайылыууна «жюген салыргъа» къолдан келгенин айтып, быллай шартла келтиргенди: "Мартда болум бла тенглешдиргенде, саусузланы санына къошула барыу 60 кереге азайгъанды. Биз март айны бошдан сагъынмагъанбыз, чек салыу ишле ол заманда башланнгандыла да»,-дегенди федерал къуллукъчу.
Ведомствону башчысы айтханына шагъатха быллай юлгю да келтиргенди: жай лагерьледе миллиондан аслам сабий солугъанды, коронавирус кенг жайылгъан кезиуле уа болмагъандыла.
Ол дагъыда саулукълары тинтилген россейлилени 24-26 процентини COVID-19 чыдарча иммунитетлери болгъанын да билдиргенди.
Роспотребнадзорну Сабийлени бла акъылбалыкъ болмагъанланы тазалыкъларына надзор этиу жаны бла бёлюмюню таматасы Галина Яновская уа россейли школлада ата-аналаны жыйылыулары онлайн амал бла бардырыллыгъын, аланы мектеплеге келиулерине чек салынырыгъын эсгертгенди.
РФ-ни Саулукъ сакълау министерствосундан билдиргенлерине кёре, коронавирусдан сакъланырча дарман салыу жаланда адамны кеси ыразылыгъы бла бардырыллыкъды.
