Къабарты-Малкъар «Машук-2018» форумда миллет майданын биринчи болуп къурагъанды. Анда республикада жашагъан юч баш миллет, юч аууз кеслерини арбазларын жайгъандыла: Зольск райондан къабартылыла, Черек райондан таулула, Май райондан да  къазакъла.
Республиканы кюнюн белгилерге КъМР-ни Правительствосуну Председателини орунбасары, олимпиадалы чемпион Мурат Карданов, КъМР-ни культура министри Мухадин Кумахов, спорт министри Ислам Хасанов да келген эдиле. Алагъа лагерьни къабакъ эшиклерини аллында  бизни жаш тёлюбюз  эмда районланы таматалары тюбегендиле. Алайдан  барысы да къошлагъа тебирегендиле. Алада къонакъланы миллет ашарыкъла бла сыйлагъандыла, экспонатланы да кёргюзтгендиле.
Сёз ючюн, черекчиле  Кязим хажини териден этилген чабырларын, эшилген ёрге жанла, жаулукъла, суратла, гоппанла, къашыкъла,  миллет кийимле кийген гинжиле,  дагъыда  эс бурурча кёп  затла келтиргендиле. Бу форумгъа жораланып  ишленнген уллу кийизге кёз атмагъан а жокъ эди. Районда  тюрлю-тюрлю усталыкълагъа юйретген арадан къызчыкъла уа алайда  окъуна кийизлеге накъышла салгъандыла.
Майскечиле уа арбазларын чакъгъан чёплеу башла бла омакъ жасагъандыла. Аланы къошларында агъач усталаны ишлерине бла тюрсюнлю халыладан оюула салыннган суратлагъа эс бурурча эди. Мурат Карданов шахмат гинжини алып, анга иги кесек сейирсинип къарагъанды.  Зольск районну келечилери уа алайда окъуна чыбыкъладан чалман эшгендиле, темир чалдишлени да хазырлап бергендиле. Жаш адамла  къонакъланы алларында  аякъ бюкгендиле, ахырында бирге тепсегендиле.   
Республиканы делегациясына башчылыкъ этген Светлана Самофалова къошла орус, къабарты, малкъар миллетлени адет-тёрелери,  адеп-къылыкълары да эсге алынып къуралгъанларын чертип айтханды.