Кёп болмай «Чайна Дейли» (Къытай), «Республика» (Азербайджан), «Трибьюн» (Франция), «Аль-Халидж»(ОАЭ), «Актуальне» (Чехия), «Фоторепортёр» (Венгрия) газетлени, Тюркню, Сауд Аравияны эм Италияны телевиденияларыны журналистлери Шимал Кавказ федерал округну регионларында пресс-тургъа къатышхандыла. Ала Элбрусну да жокълагъандыла.
Азау талада къонакълагъа КъМР-ни курортла эм туризм министри Мурат Шогенцуков бла «Элбрус курорт» биригиуюню таматасы Беккаланы Хыйса тюбегендиле. Ала республикада туризмни болумуну юсюнден толу хапар билдиргендиле, тау лыжа спорт жылдан-жылгъа айный баргъанын белгилегендиле. Туристле къайсы къыралладан аслам келгенлерин, туризм жаны бла байламлыкъланы, къоркъуусузлукъ жаны къаллай мадарла этилгенлерин эмда кёп башха соруулагъа жууапла бергендиле.
- Къоркъуусузлукъну жалчытыу республиканы Башчысыны контролюндады. Арт жыллада ич ишле органланы келечилерини эмда жамаутны тирилиги бла Къабарты-Малкъар эм ырахатлы регионладан бирине саналады. Россейден, тыш къыралладан келген туристлени санына да къошула барады. Анга кёбюсюнде къыралны бла бизнесни араларында къыйматлы бирге ишлеу себеплик этеди. Кёп болмай Къытайдан келген къауум бла магъаналы келишимле этилгендиле, ол санда туризм жаны бла да,- дегенди Мурат Шогенцуков.
Журналистле Минги тауну тийресинде инфраструктураны, канат жолланы, тау лыжа жолланы эмда башха затланы да бек жаратхандыла. Эндиге дери Элбрусну юсюнден уллу хапарлары болмагъанына да жарсыгъандыла.
- Белгилисича, Шимал Кавказны юсюнден дунияда кёбюсюнде иги хапарла жюрюмейдиле. Мен а бери керти болумну билир эмда аны жерлешлериме билдирир ючюн келгенме. Энди хар неда эшитгенимча болмагъанын кёреме,-дейди Чехиядан келген журналист Иржи Юст.
Железноводск шахарда уа журналистле СКФО-да туризмни айнытыугъа жораланнган «тёгерек столгъа» къатышхандыла. Анга Россейни Шимал Кавказны ишлери жаны бла министерствосуну, «Курорты Северного Кавказа» биригиуню эм толтуруучу власть органланы келечилери да чакъырылгъан эдиле. Анда Къабарты-Малкъарны туризм жаны бла къыйматлы проектлерини юслеринден министр Мурат Шогенцуков билдирген эди.
