Къабарты-Малкъарны тауларында къар юзюлюп, Росгвардияны тёрт къуллукъчусу ажымлы ёлгендиле. Республиканы Башчысы Юрий Коков аланы жууукъларына бла ахлуларына къайгъы сёз бергенди. Аны РФ-ни Миллет гвардиясыны аскерлерини федерал службасыны директору, армияны генералы Виктор Золотовха жиберген телеграммасында былай айтылады:
«Къабарты-Малкъарны жамауатыны атындан Росгвардияда къуллукъ этген жашланы ёлгенлерине бушуу этгенибизни билдиреме, аланы жууукъларына бла ахлуларына къайгъы сёз береме. Ол ачыуну кётюралырча,  алагъа уллу чыдамлыкъ, сабырлыкъ да тилейме.
Бусагъатда КъМР-ни Правительствосу тийишли мадарла эте турады, республика  битеу керекли болушлукъ тапдырыргъа хазырды».
Толу болмагъан шартлагъа кёре,  къар юзюлгенден сора аскерчиле Межерги чыранны эмда Дых-Тауну бла Пушкин атлы пикни араларында 4,5 минг метр бийикликден  кетгендиле.