Къабарты-Малкъар къырал университетде «гериатрия» ыздан Халкъла аралы илму-практикалы конференция бардырылгъанды. Анга бу жаны бла энди ишлеп башлагъанла къатышхандыла эмда ол «Приоритет - 2030» программаны чеклеринде къуралгъанды.

Жыйылыугъа келгенлени алларында КъМКъУ-ну  илму-тинтиу ишле жаны бла  проректоруну къуллугъун толтургъан Светлана Хаширова сёлешгенди. Ол быллай тюбешиуле жаш тёлюге аланы усталыкъларын ёсдюрюу эмда саулукъ сакълауну бу бёлюмю бла байламлы ангылауларын, сейирлерин да кенгертиу жаны бла магъаналы болгъанларын чертгенди.

Ызы бла РФ-ни Саулукъ сакълау министерствосуну «Тамата тёлю» атлы Федерал арасыны эксперт-методикалы бёлюмюню таматасы Ольга Аброськина гепатрия Россейде алыкъа жангы, алай эсе да, тири айнып баргъан медицина усталыкъ болгъанын эмда ол ыз абадан тёлюню саулукълары бла байламлы жашауларын эмда ала кеси кеслерине къараялырча онгланы игилендириу бла байламлы болгъанын да ангылатханды.

Эсгерте кетейик, бу усталыкъгъа  КъМКъУ-ну медицина академиясыны жамауатны саулугъу, саулукъ сакълау эмда профилактикалы медицина кафедрасында илмуланы доктору Аксана Кардангушеваны башчылыгъы бла бардырылады. Студентлеге бла ординаторлагъа  мында хайырланылгъан программала саулукъ сакълауну бу бёлюмюн теренирек билирге онг бередиле.

Гериатрияны жарсыуларыны, абадан адамланы саулукъларында тюрлениулени мардагъамы огъесе патологиягъамы санаргъа боллугъуну юсюнден а «Тамата тёлю» араны башчысыны орунбасары Светлана Свищева кесини оюмларын билдиргенди.

Тюбешиуде бу бёлюмден ангылаулары болгъан бирсиле да  сёлешгендиле. Аланы араларында уа КъМР-ни Саулукъ сакълау министерствосуну штатда болмагъан баш специалисти гериатры Фатима Думанова, республиканы «Гериатриялы арасыны» баш врачыны къуллугъун толтургъан Руслан Хаджимуков, ведомстволу министерствону келечиси Елена Мозокова эмда башхала сёлешгендиле.

КъМКъУ бла Россейни Н.И. Пирогов атлы миллет тинтиуле бардыргъан медицина университети (РНМИУ) преподавательлени бла студентлени усталыкъ жаны бла ангылауларын  ёсдюрюр мурат бла биригип ишлеуню юсюнден келишим этгендиле. Анга уа ректорну къуллугъун толтургъан Юрий Альтудов бла Россейни геронтологиялы илму-клиника арасыны энчиленнген бёлюмюню директору Ольга Ткачева къол салгъандыла. Келишимни чеклеринде университетни медицина академиясыны ординаторлары РНМИУ-де бла Рязань областьны «Гериатриялы арасында» стажировкалада болгъандыла.

Тюбешиуде, андан сора да, «Шёндюгю гериатрия» темагъа «Тёгерек стол» къуралгъанды. Анда уа гериатрияны жыйымдыкъ амалларыны юслеринден сёз баргъанды. Башхача айтханда уа, медикле тамата тёлюню жашауу тынчлыкълы болуруна къайгъырыулукъда бу ыз бла байламлы оюмларын билдиргендиле.

Трамланы Зухура.