Арт жыллада КъМР-ни Эл мюлк министерствосуну башчылыгъы бла «Комплекс халда эл жерлени айнытыу» къырал программагъа кёре, элде жоллагъа тынгылы ремонт этиледи. Алай бла быйыл Урван эм Басхан районлада Кахун бла Псыхурей эллени орамлары да жангыртыллыкъдыла.  Анга деп федерал эм республикалы бюджетледен 89,75 миллион сом бёлюнюрюкдю. 

Жолланы барысы да администрацияла, амбулаторияла, мектепле, спорт залла эм башха учрежденияла орналгъан, агропромышленный комплекслеге, суу бла жалчытхан объектлеге элтген социал-экономика магъанылыдыла.

 Ишлени кезиуюнде Кахунда 700 метр чакълы бирде малла тургъан комплексге баргъан жол жангыртыллыкъды. Псыхурейде да 6,1 километр тенгили бирде таш жолгъа асфальт жайып, жангы излемлеге келиширча этерикдиле.    

Андан сора да, сагъынылгъан къырал программаны чеклеринде Тырныауузда таза суу бла тынгылы жалчытырча тёрт объект ишленирикди. Сабий садха, спорт школгъа, сабий эм жаш тёлю чыгъармачылыкъ арагъа да тынгылы ремонт бардырыллыкъды. Графикге кёре, сабий садда бла чыгъармачылыкъ арада игилендириу ишле быйылдан кеч къалмай башланырыкъдыла эм экинчи жылны ахырына тамамланыргъа керекдиле. 

Аны бла бирге былтырдан бери Элбрусда Маданият юй бла гитче спорт комплексни къурулушу барады. Псыхурейде бла Шалушкада да Маданият юй эм уллу спорт комплекс ишлене турады.