КъМР-ни Парламентини Физкультура, спорт эм туризм эмда Аграр соруула, табийгъатны хайырланыу, экология эм тёгерекдеги къудуретни сакълау жаны бла комитетлери  бирге бардыргъан кенгертилген жыйылыуда Чегем муниципал районну юлгюсюнде туризмни файдалы бёлюмлерин айнытыуну соруулары сюзюлгендиле 

 Аны ишине законла чыгъарыучу органны башчысыны орунбасарлары Жанатайланы Салим бла Мурат Карданов, депутатла, жууаплы органланы келечилери къатышхандыла. 
Физкультура, спорт эм туризм комитетни башчысы Арсен Барагунов, тюбешиуню ача, Чегем район КъМР-де айбат, табийгъат эм тарых эсгертмеледен бай жерледен бири болгъанын айтханды. Мында этнография, эл мюлк, маданият-жарыкъландырыу эм экстремал туризмни айнытыргъа битеу онгла бардыла. Депутат бюгюнлюкде къыралда ич туризмге энчи эс бурулгъанын белгилеп, республикада бу сферада болгъан кемчиликлени кетерирге, къонакъланы санын алай бла кёбейтирге кереклисини юсюнден айтханды. 
Аграр соруула, табийгъатны хайырланыу, экология эм тёгерекдеги къудуретни сакълау жаны бла комитетни башчысы  Артур Текушев къонакъла сюйюп келген жерлени шёндюгю излемлеге келишдириу, тарых эсгертмелени тапландырыу, жангы маршрутла къурау жумушла Чегемге келген туристлени санын кёбейтирге онг берлигин белгилегенди. 
Районну башчысыны экономика соруула жаны бла орунбасары   Амир Цеев эм КъМР-ни Курортла эм туризм министерствосуну   бёлюмюню таматасы   Виолетта Каскулова  туризмни айнытыу жаны бла къаллай мадарла толтурулгъанларыны, мындан ары борчланы бла башламчылыкъланы юслеринден билдиргендиле.
Чегем районнга  былтыр жюз мингден аслам адам келгендиле. Битеу да бирге районда алты къонакъ юй бардыла, алада беш жюз адам сыйынады. Асламында Чегем чучхурланы,   Эл-Тюбю элни, «Огъары Чегем» археология-турист комплексни, Къулийланы Къайсынны туугъан юйюн, Къум-Тюбю сыртлыкъны кёрюрге келедиле  адамла. Чегем ауузда дагъыда   парапланеризм, роуп-джампинг дегенча экстремал солуу да къуралгъанды. Къабарты-Малкъар бийик-тау къырал   заповедникде уа беш экология маршрут къуралгъанды. Аладан бири  Башилдеди.   
«Тау Къабарты-Малкъар» регион маршрут   тири айнытылады мында. Муратланы юслеринден айтханда,  Акътопуракъ  ауушну айыныу жаны бла мадарла къураладыла.  Анда жаяу айланырча эмда солурча жерле боллукъдула. 
 Сюзюлген соруугъа оюмларын айта, жыйылгъанла туристлени къоркъуусузлукъларын жалчытыуну, бийик-тау заповедникни эм  экология маршрутланы болумларыны, къонакъбайлыкъ сферада объектлени кёбейтиуню,  бу жумушла бла кюрешгенлеге себепликни, агротуризмни айнытыуну, турист полиция къурауну, башха регионланы сынаулары бла шагъырейлениуню, къонакъ юйлени ишлетиуню, туристлени жумушларын тамамлауну игилендириуню юслеринден айтылгъанды. 
 Жыйылыуда этилген башламчылыкъланы бирге келишдирип, жууаплы органлагъа эсгертиуле къабыл кёрюлгендиле. 

КъМР-ни Парламентини пресс-службасы.