Черек районда адамлагъа социал жумуш этиу жаны бла «Комплекс ара» къырал казна учрежденияда  озгъан орта кюн эрттенлик,  башха кюнледеча болмай, хычыуун жумушдан башланнганды. Анда ишлегенлени эмда арада кечиннген къонакъланы  комплексни оноучулары алгъышлагъандыла.   Профессионал байрам бла алгъышларгъа  арагъа  дагъыда Черек муниципал районну ветеранларыны советини келечилери Жаболаны Жабраил эмда  Таукенланы Зухура  да келгендиле. Социал службада ишлегенлени бир къауумларын  ала да  белгилегендиле.

«Уруш жылланы сабийлери» деген майдал бла Жага Борсов эмда Эфендиланы Танзиля  саугъаланнгандыла.

Ветеранланы советини грамоталарына уа Локияланы Алим, Улбашланы Алим, Бийнёгерланы Наргиза, Маммеланы Анжелика, Къадырланы Раузат, Таппасханланы Сакинат, Иттиланы Люба, Мокъаланы Лейля, Зульфия Икрамова, Залина  Борсова да тийишли болгъандыла.

Организацияны башчысы  Улбашланы Алина да боюнларына алгъан жумушну тынгылы тамамлагъанлары ючюн грамотала бла бир къауум адамны  саугъалагъанды.  Аланы араларында  Жекеланы  Лабадин, Ногерланы Хамби, Бёзюланы Фатимат,  Мадина Абабиева,  Къадырланы Джанита эмда Чеченланы Земфира  бардыла.

-Бу араны  бёлюмлеринде ишлегенле барыгъыз да  кюн сайын  борчугъузну айыпсыз тамамлайсыз, мен бек ыразыма. Жылгъа салгъан планларыбыз  толтуруладыла.  Анга шагъатха жаланда социал болушлукъ кереклиле бизге  къайтып келирге сюйгенлерин  айтып къойсакъ да, тамамлыкъ этерикди. Ма олду ахшы кёрюмдю да.  Ишигиз къыйын болгъанына да къарамай, сиз аны тынгылы тамамлайсыз.  Барыгъызгъа да  профессионализмигиз, бери келгенлеге ёз адамларыгъызгъача къарап, жюреклерине жете билгенигиз  ючюн  ыспас эте, сау болугъуз дейме. Дагъыда бир кере байрам бла къызыу алгъышлайма, мындан ары да тутхан ишибизде бет жарыкълы болурубузгъа ийнанама,-дегенди  араны башчысы  Улбашланы Алина.

Холаланы Марзият.