Кёп болмай Россейни Сюд приставларыны  федерал службасыны Къабарты-Малкъарда управлениясы эмда Ич ишле министерствону транспорт бёлюмю «Борчлу» оператив-профилактика ишни чеклеринде  «Борчларынгы юсюнден бил» деген кезиулю акцияны бардыргъандыла.

 Быллай иш  «Нальчик» халкъла аралы  аэропортда бла   темир жол вокзалда терк-терк ётдюрюледи. Бу жол да  пассажирлени база бла тинтгендиле.   Къонакъланы сакълагъанла эм башхала да сюд приставладан электрон  сервисни ишлеуюню юсюнден эсгертиуле  алгъандыла. Аладан  къалай къутулургъа боллугъуну  юсюнден да  билгендиле.

 Къабарты-Малкъар Республикада Сюд приставланы  федерал службасыны управлениясындан билдиргенлерича,   ведомствону  сайтында борчланы юсюнден  толу хапар  билирге  боллукъду. Борчланы тёлеп къутулур онг да барды. Андан сора да, Къырал эмда муниципал жумуш этиуню бир порталында борчлары болгъанлагъа билдириуле этилгенлей турадыла.  Соруулары болгъанланы асламысына  къысха заманда жууап тапдырылады. 

Борчлула, эртте-кеч болса да, жууапха тартылмай къалмайдыла. Солургъа тебиреген инсаннга тыш къыралгъа чыкъмазча чекле салынсала уа, бютюн аман кёрюнеди.