Республикада алты консерва завод жашил къудоруну жарашдырып башлагъандыла. Бизни регионда ол эм биринчи бишген битимге саналады, дегендиле Эл мюлк министерствода.

Алай бла предприятияла бюгюнлюкге онбир миллион (условный) банка консерва чыгъаргъандыла. Продукцияны къанжал эмда мияла орунлагъа къуядыла.

Жашил къудоруну ёсдюрюу бла бизде асламысында заводла кеслери кюрешедиле, жарашдыргъан да ала этедиле. Министерствода айтханларына кёре, быйыл ол беш минг гектарда битгенди. Озгъан жыл бла тенглешдиргенде, хазна тюрленмегенди.

Былтыр Къабарты-Малкъарда 62 миллион банка къудору консерва чыгъарылгъанды. Консерваланы башха тюрлюлерини ёлчеминде ала 17,5 процентни алгъандыла.

Бизни корр.