Республиканы Саулукъ сакълау министерствосуну башламчылыгъы эм Спорт министерствосуну себеплиги бла Нальчикде Сабий стадионда, Медицина ишчини кюнюне аталып, битеу медицина организацияланы келечилерини араларында эришиуле бардырылгъандыла. 

Турнир биринчи кере былтыр къуралгъанды. Быйыл анга 360 адам – 12 команда къатышхандыла. Эм алгъа ала шахматла бла гитче футбол ойнагъандыла, теннисде бла женгил атлетикада – 200 эм 400 метрге чабыуда – сынашхандыла, къатыш эстафетада, ташны бла резин топну атыуда, узунлукъгъа секириуде, гимнастика упражнениялада, канатны тартыуда къарыуларын кёргендиле. Медикле, аланы эришгенлерине къараргъа келгенле да, плов, локъумла, бишлакъ, квас эм суу бла сыйланнгандыла. Ызы бла хорлагъанланы саугъалау болгъанды.

Алай баш саугъа – битеукоманда кубок – эм кючлю къауумгъа 16 июньда, Медикни кюнюнде, къууанчлы халда Къырал концерт залда  боллукъ концертни кезиуюнде берилликди. Экинчи эм ючюнчю жерлеге чыкъгъан командала да энчи саугъаланырыкъдыла.

Спартакиаданы тёрели этер, саулукълу жашау бардырыуну ниетин жамауатда жаяр умут бла аны жыл сайын къураргъа белгиленеди.

Кульчаланы Зульфия.