Барыбыз да билгенден, байрым кюн республиканы эллеринде, шахарларында субботникле бардырылгъандыла. Быллай ишге адамла тири къатышадыла.

Акъ суучула да артха къалмагъандыла. Эрттенликде элни администрациясыны башчысы Гергъокъланы Тимур, аны орунбасары  Бёзюланы Рустам эм аланы биргелерине ишлеген къызла, жашла элге кирген жерде, урушха къатышхан эллилерине салыннган эсгертмени къатына жыйылгъандыла.
Эсгертмени тёгерегинде юлкюле, чырпыла ёсе эдиле. Жашла аланы кесип кетергендиле. Тёгерегинде хансын чалгъандыла. Къызла уа кир-кипчикни жыйып, тёкгендиле, алайланы сыйпап, тазалагъандыла. Алайда ишле бошалсала, башха жерлеге да ётерикдиле.
Тимур айтханнга кёре, жууукъ заманда эсгертмеге тынгылы ремонт этилликди. Шёндю аны оноуу этиле турады.
Уллу Ата журт урушха къатышхан акъ суучуланы хурметлерине орнатылгъан эсгертме элни сыйлы жерлеринден бириди. Анга дайым эс бурулгъанлай турургъа тийишлиди.

Османланы Хыйса.