УФ-м ШынагъуэншагъэмкIэ и Советым и Секретарь Патрушев Николай мэлыжьыхьым и 13-м Налшык щригъэкIуэкIащ зи пашэ IэнатIэм и зэIущIэ. Ар теухуауэ щытащ Кавказ Ищхъэрэ федеральнэ щIыналъэм (КИФЩI) шына­гъуэншагъэр къыщызэгъэпэщынымкIэ Iуэхугъуэ щхьэхуэхэр егъэкIуэкIын зэрыхуейм. Лэжьыгъэм хэтащ УФ-м и Президентым и полномочнэ лIыкIуэу КИФЩI-м щыIэ Чайкэ Юрий, Кавказ Ищхъэрэм хиубыдэ щIыналъэхэм я Iэтащхьэхэр, федеральнэ министерст­вэхэмрэ ведомствэхэмрэ я лIыкIуэ­хэр. 

Зэкъуэтыныгъэр къару лъэщщ

Патрушев Николай и къэпсэлъэныгъэм къыхигъэщащ: «Лъэпкъыбэу зэдэпсэу къэралым и зэкъуэтыныгъэр ­къагъэтIэсхъэн папщIэ къагъэсэбэп Iэмалхэм ящыщщ цIыхум и гупсысэр зэтезыгъэкI хъыбар нэпцIхэр жылагъуэм щыгъэIуныр, Iуэхугъуэ мыхъумыщIэхэр лэжьыным хузэщIэгъэстыныр, тхыдэр зэблэшыныр. Урысейм и текIуэныгъэращ ди къэралым шынагъуэншагъэ къыщы­зэзыгъэпэщыфынур, Европэр зэпIэзэрыт щытыкIэм хуэзышэжыфынур, Iуэху еплъыкIэ зэмылIэужьыгъуэхэр къыщалъытэ дуней зэтезыгъэувэфынур». 
Чайкэ Юрий къызэрыхигъэщамкIэ, ­къухьэпIэмкIэ къикI шынагъуэм щыхэ­-хъуэ зэманым мыхьэнэ иIэщ къэрал унафэщIхэм хъыбар пэжыр и чэзум цIыхубэм ирагъэщIэным, ахэр экстремист Iуэхугъуэхэм дамыхьэхын папщIэ. 
«УФ-м и Президентым и полномочнэ лIыкIуэу КИФЩI-м щыIэм и аппаратыр ди дэIэпыкъуэгъуу, щIыналъэм хиубыдэ субъектхэм щыдогъэзащIэ щIалэгъуалэр, къытщIэхъуэ щIэблэр хэкупсэу гъэсэным хуэщIа проектхэр. Кавказ Ищхъэрэм щыпсэу лъэпкъхэм я щэнхабзэхэр, анэдэлъхубзэхэмрэ хабзэхэмрэ хъумэ­ным, жылагъуэм пщIэ щаIэным гулъытэ худощI. ЩIэблэр экстремизмэм пэщIэ­тыфыным, къэралым щызекIуэ хабзэхэр ягурыгъэIуэным хуэгъэпсауэ зэхыдошэ школакIуэхэмрэ студентхэмрэ я зэ­хуэсхэр», - къыхигъэбелджылыкIащ Чайкэ Юрий. 
КIуэкIуэ Казбек фIыщIэ яхуищIащ мыхьэнэшхуэ зиIэ зэIущIэм хэтыну ди республикэм къэкIуахэм. «Псоми къыдгуроIуэ дызытепсэлъыхь Iуэхугъуэм дэтхэнэм и дежкIи мыхьэнэшхуэ зэриIэр. Республикэм и унафэщIхэм федеральнэ, щIыпIэ хабзэхъумэ IуэхущIапIэхэр ди ­гъусэу а унэтIыныгъэмкIэ лэжьыгъэхэр щыщIэдгъэхуэбжьэнщ. ЗэIущIэм къыщащтэну унафэхэр Iуэхур нэхъ тэмэму зэфIэхынымкIэ сэбэпышхуэ зэрыхъунур си фIэщ мэхъу», - жиIащ КIуэкIуэм. 
ЗэIущIэм гулъытэшхуэ щыхуащIащ жылагъуэм экстремист гупсысэкIэм зыщемыгъэужьыным, террорым пэщIэты­фын Iуэхугъуэхэр щегъэкIуэкIыным. Къэралым щыпсэу лъэпкъхэм, щызекIуэ динхэм яку зэныкъуэкъухэр къыдэзылъ­хьэну хущIэкъуу КъухьэпIэмкIэ къикI гупсысэхэм ткIийуэ пэщIэтын зэрыхуейри къыхагъэщащ.

Къэрал къулыкъущIэхэр зочэнджэщ

Ди республикэм лэжьыгъэ IуэхукIэ къэкIуа Патрушев Николай щхьэхуэу яхуэзащ Чайкэ Юрийрэ КIуэкIуэ Казбекрэ. 
Къэрал къулыкъущIэхэр тепсэлъыхьащ Къэбэрдей-Балъкъэрым щIэпхъаджагъэхэм щапэщIэтын зэрыхуейм. Гулъытэ хэха хуащIащ къэхъункIэ хъуну террорист шынагъуэхэм и чэзум пэщIэувэным, апхуэдэуи ахэр къэмыгъэхъуным елIэ­лIэнми. Зэхуэсым и гугъу щащIащ щIалэ­гъуалэм дзэ-хэкупсэ, псэкупсэ гъэсэныгъэ егъэгъуэтыным.

Фэеплъхэм пщIэ хуащI

Къэбэрдей-Балъкъэрым зэрыщыIэ зэманым къриубыдэу, УФ-м Шына­гъуэншагъэмкIэ и Советым и Секретарь Патрушев Николай кIуащ Урысей гвардием и щIыналъэ IэнатIэмрэ МВД-м Къэбэрдей-Балъкъэрым щиIэ къудамэм Экстремизмэм пэщIэтынымкIэ и центрымрэ. Абы и гъусэу а IуэхущIапIэхэм щыIащ УФ-м и Президентым и полномочнэ лIыкIуэу КИФЩI-м щыIэ Чайкэ Юрийрэ КъБР-м и Iэтащхьэ КIуэкIуэ Казбекрэ. 
УФ-м ШынагъуэншагъэмкIэ и Советым и Секретарым щыгъуазэ зыхуищIащ а частхэм яIэ дзэ техникэм, Iэщэ-фащэхэм, зригъэлъэгъуащ Урысей гвардием и къу­лыкъу щызыщIэхэм ябгъэдэлъ зауэ, спорт зэфIэкIхэр. Апхуэдэуи а IэнатIэхэм я уна­фэщIхэм я къулыкъум епха IуэхугъуэхэмкIэ епсэлъылIащ. 
Патрушев Николай удз гъэгъахэр трилъхьащ Урысей гвардием Къэбэрдей-­Балъкъэр Республикэм щиIэ Управленэм и къулыкъущIэхэу я къалэн ягъэзащIэу хэкIуэдахэм я фэеплъым. 

ЩIыналъэм и щытыкIэм зыщегъэгъуазэ

Чайкэ Юрийрэ КIуэкIуэ Казбекрэ лэ­жьыгъэ IуэхукIэ иужькIэ Налшык щызэIущIащ. УФ-м и Президентым и полномочнэ лIыкIуэу КИФЩI-м щыIэр ди республикэм къэкIуат, УФ-м Шына­гъуэншагъэмкIэ и Советым и Секретарь Патрушев Николай Кавказ Ищхъэрэ ­федеральнэ щIыналъэм и шынагъуэншагъэм теу­хуауэ ди къалащхьэм щригъэкIуэкIа зэхуэсым хэтыну. 
ЗэIущIэм щытепсэлъыхьащ ди республикэм щыщыIэ социально-экономикэ, жылагъуэ-политикэ щытыкIэхэм. Ахэр гупсэхуу къытеувыIащ УФ-м и Президентым а унэтIыныгъэхэмкIэ ищIа унафэхэр щIыпIэм зэрыщагъэзащIэм. Апхуэдэу зэIущIэм къыщаIэтащ щIыналъэм экономикэ и лъэныкъуэкIэ нэхъ псынщIэу зезыгъэужьыну проектхэр зэрыщагъэзащIэм, республикэм цIыхухэр лэжьыгъэ IэнатIэкIэ къызэрыщызэрагъэпэщым, лъэпкъ проектхэм зэрыщелэжьым.

КъБР-м и Iэтащхьэмрэ Прави­тельствэмрэ я пресс-IуэхущIапIэ.