Тюбешиуню ача, Артий комитетни вице-президенти, Кавказда  бёлюмюню башчысы  Ауес Бетуганов былтыр  Россейни хазна къалмай битеу регионларында бардырылгъан  тюрлю-тюрлю  чыгъармачы проектле маданиятны байыкъландырыугъа себеплик этгенлери бла къалмай, миллионла бла адамланы бирикдиргенлерин чертгенди. «Россей деменгили къыралды, анда кёп миллетле жашайдыла, ол себепден  бир бирни ангылаулукъ болса сюебиз, анга уа маданиятха къуллукъ этгенлени себепликлери уллуду»,-дегенди.

Ауес Бетуганов  быллай фестивальла фахмулу жаш адамланы  ачыкълаугъа, аланы Россейни  эмда халкъла аралы  сахнагъа  чыгъарыугъа себеплик этгенлерин да белгилегенди.

Бу жол Нальчикге  Шимал Кавказны республикаларындан,  Москвадан, Санкт-Петербургдан, Абхазиядан, Ставрополь эмда Краснодар крайладан, Юг Осетиядан, Ростов областьдан, Адыгеядан, Сириядан, Египетден да кёпле келгендиле. Ала жырда, тепсеуде, инструментлени согъууда, назму  айтыуда да усталыкъларын юч кюнню ичинде кёргюзтгендиле.  Ирина Даурова башчылыкъ этген  «Кавказны сабийлери» жыр къауум а малкъар тилде  «Тепенаны» жырлагъанды.

Жюрини къауумуна кирген  жырчы Ирина Даурова  сайлау этген алагъа тынч болмагъанын айтханды.  Болсада  конкурсну сурамлары къаты эдиле. Аны себепли  жюрини къаууму, тынгылы  сагъыш этип, баш саугъаны юч коллективге тийишли кёргенди:  Москва областьдан   халкъ тепсеуню  «Шаудан» ансамблине, Къабарты-Малкъардан «Псыгансу» эмда Сочи шахардан «Шапсугия»  тепсеу къауумлагъа. Алагъа дагъыда кубокла,  алтын майдалла, дипломла да берилгендиле. 

-Фестиваль-конкурсну атына «Нальчик -насыпны налы» деп бошдан аталмагъанды. Аны эсге ала, биз кишини да къуру къоймагъанбыз, дипломла, сертификатла,  майдалла  бла да белгилегенбиз, - дегенди Ирина Даурова.

Тёртюнчю кюн а  жолоучулукълагъа жораланнганды. Бир къауумла - Чирик кёллени, башхалары - Чегем чучхурланы, ючюнчюлери да Нальчик шахарны айбат жерлерин жокълагъандыла. Коллективлени башчылары уа Долинскде Малкъар халкъны кёчгюнчюлюкде азап чекгенлерини мемориалына къараргъа баргъандыла, Мечиланы Кязимни къабырына, Нальчикде Белгисиз солдатны эсгертмесине гюлле салгъандыла.

Кетип бара, конакъла республиканы бек жаратханларын,  бери къайтыргъа сюйгенлерин да айтхандыла.

Холаланы Марзият.