Кёп болмай Нальчикде Ленин атлы проспектде 26-чы номерли кёп фатарлы юйде жашагъанла Битеуроссей халкъ фронтну Къабарты-Малкъарда бёлюмюне(ОНФ) арбазларында уллу бузукълукъла бла къурулуш ишле баргъанларына тарыкъгъандыла.
ОНФ-ни келечилери алайгъа барып, кертиси бла да, 2-чи, 5-чи эм 6-чы номерли фатарланы иеси аланы кеси сюйгенича тюрлендирирге кюрешип, юйню тутхучларын къарыусуз этгенин кёргендиле. Эркинликсиз эм бузукъла бла бардырылгъан ремонт, жашауну журтну иесинден сора да, подъездде жашагъанлагъа уллу хата салыргъа боллугъу баям эди.
Къоншула айтханларыча, ремонт баргъанлы беш жыл болады. Тюрлендириу жаны бла этилген жумушла тийишли излемлеге келишмегенлерин, юйню къабыргъалары къарыусуз болгъанларын, инженер сетьле бузулгъанларын жашау журт жаны бла инспекция да тохташдыргъанды.
Бузукъчу къабыргъаланы къалынлыкъларын эки кереге азайтханды, фатарланы ичлеринде уа аланы арталлыда кетергенди. Бюгюнлюкде юйню атлауучларын тутхан аркъау ачылгъанды эм къабыргъасы да жарылгъанды, фатарладан бирини полунда уллу тешик къуралгъанды. Сабийлери ачымаз ючюн сау юйюрге бир къауум заманнга башха жерге кёчерге тюшгенди.
Юйню биринчи къатысында фатарны да болуму осалды. Мында алгъа ариулукъну салону ишлегенди, бусагъатда уа башы оюлуп, иесиз къалып турады.
– Биз тарыгъыулагъа эс буруп объектге келгенибизде, айтылгъан шартла толусунлай ачыкъланнгандыла. Кертиси бла да, шахарны ортасында юч къатлы юйню подъезди тозурагъанды. Фатарланы иеси, уллу терезеле салыр ючюн, къабыргъаланы ойгъанды эм къыш сууукълада терезеле салмай, къоншуларын жунчутады. Ремонт ишле бла байламлы дагъыда башха танг кесек бузукълукъ табылгъанды. Аланы барын да суратха эм видеогъа тюшюргенбиз. Мындан арысында подъездни алгъыннгы халына келтирирча мадар излерикбиз, – дегенди ОНФ-ни эксперти Ислам Макоев.
Ол айтханнга кёре, къурулушну кезиуюнде авариялагъа келиучю тийишли службала чакъырылып тургъандыла. Анга да къарамай, ремонт ишле тохтамагъандыла. Ич ишлени, толтуруучу власть органланы келечилери да жашау журтну иесин жууапха тарта тургъандыла. Алай ол, этилген оноулагъа да къарамай, къамарыкъгъа ушамайды.
Жамауатчыла КъМР-ни прокуратурасына, КъМР-ни Тарифле эм жашау журтлагъа надзор этиу жаны бла къырал комитетге, КъМР-ни Къурулуш эмда жашау журт-коммунал мюлк министерствосуна тарыгъыула жибергендиле.
Битеуроссей халкъ фронтну келечилери болумну контрольда тутарыкъларын билдиргендиле.
Магометланы
Сулейман.
