РФ-ни Экономиканы айнытыу министерствосуну регион политика Департаменти бардыргъан видеоконференциягъа КъМР-ни экономиканы айнытыу министрини орунбасары Ольга Белецкая бла макроэкономика эмда прогнозла бёлюмню башчысы Марина Муратова къатышхандыла. Тюбешиуде сёз Россейге санкцияла салыннган халда экономикагъа билеклик этиуню юсюнден баргъанды.

Жыйылыугъа къатышханлагъа шёндю бу жаны бла къаллай онгла болгъанларын билдиргендиле. Бюгюнлюкде Россейде экономиканы айнытыргъа себеплик этерик план барды. Аны болжалына салмай тамамларгъа тийишлиди. Правительствону Президиумуну комиссиясында бу планны быйыл 15 мартда къабыл этген эдиле. Ал заманда анда 170 жумуш бар эди. План кезиу-кезиу тюрлене барады, шёндю ары 309 жумуш киреди.

Регионла кеслерини оюмларын Къырал Советни органларын информация-аналитика жаны бла жалчытхан «Госсовет» системагъа жиберирге боллукъдула. Анда аналитика модуль Россей Федерацияда эм магъаналы бёлюмледе кёрюмдюлени тийишдирип, ангылашыныулу халда кёргюзтеди.

Улбашланы Мурат хазырлагъанды.