Нальчикни курорт кесегинде – «Водолечебницаны» тийресинде – он ариу секвойя терек ёсерикди. Ала белгили россейли эм халкъла аралы жолоучула Саша Холодныйни (Александр Морозов), Николай Баландинскийни эм «Кемпинг бла автотуризм индустрияны усталарыны миллет союзуну» экспедиция арасыны башламчылыкълары бла «Ата-бабаланы хазналарындан туудукъланы эслерине» деген проектни чегинде орнатылгъандыла, деп билдиреди республиканы Курортла эм туризм министерствосуну жамауат эм асламлы информация органла бла байламлыкъла жюрютюу жаны бла бёлюмюню башчысы Ольга Погребняк.
Жер жюзюне кезиулю жолоучулукъларын ала УАЗ-452 автомобильде 19 сентябрьде Москвадан атланнгандыла, аланы жоллары Россейни Югуну бла СКФО-ну субъектлери бла да барады. Республикада проектни тамамлаугъа себепликни Курортла эм туризм министерство этгенди, «Водолечебница» бла «Курорт Нальчик» обществоланы башчылары Чапайланы Аслан бла Хасанби Афов болушхандыла.
Огъурлу ишге курорт эм туризм министрни орунбасары Шауаланы Ислам, Хасанби Афов, Чапайланы Аслан, Орус география обществону регион бёлюмюню башчысыны къуллугъун толтургъан Мухамед Кожоков, «Кавказ. РФ» обществону власть органла бла байламлыкъла жюрютюу жаны бла бёлюмюню таматасы Анзор Метов, санаторий ишни ветераны врач-терапевт Султан Кажаев къатышхандыла. Александр Морозов айтханыча, Нальчикде хауа болумла, эм алгъа уа, сууукъ, къаты желле болмагъанлары секвойяланы жайыугъа аламат келишедиле. «Терекле мында тамыр иерлерине ишексизме. Ала бир жылгъа бир метрге дери ёсгенлерин эсге алсагъ а, талай жылдан ариу тереклени кёрлюгюбюзге ийнанама», – дегенди ол.
Шимал Кавказгъа жолоучулукъну дагъыда бир борчу тарых, бюгюннгю болум бла да шагъырейлениудю. Анга кёре команданы келечилери Александр, Николай бла Аврора Спиридонова болгъан жерлерини тарыхларын жыйышдырадыла, сейир адамла бла танышадыла. Бир терек – бир тарых. Ол тарыхны сакълаугъа бла регионну суратлаугъа кесича къошумчулукъду.
Кульчаланы Зульфия.
