Нальчикде «Спартак» стадионда футболдан Юг зонаны жаш тёлю лигасыны 16-чы туру бардырылгъанды. Анга 2007 жылда туугъан спортчуладан къуралгъан командала къатышхандыла. Матчда «Спартак-Нальчик» бла «Сочи» клуб тюбешгендиле.
Биринчи таймда эки команданы да чабыууллары голлагъа келтирмегендиле. Спартакчыла низамлыракъ болгъандыла, сабыр ойнагъандыла. Къонакъ команданы келечилерине уа бузукълукълары ючюн талай кере сары карточкала окъуна кёргюзтюлгендиле. Экинчи тайм нальчикчилеге иги башланнганды: Джамбулат Кушхов, къаршчы къауумну къоруулаучуларындан къутулуп, гол ургъанды, 1:0 эсеп оюнну ахырына дери тюрленмегенди.
Бу матчдан сора «Спартак-Нальчикни» жаш командасы таблицада алтынчы жерде барады. Ол бусагъатда лиганы экинчи къауумунда ойнайды, ары финалгъа чыгъалмагъан командала тюшгендиле. Спартакчыланы тренер Аскер Кушхов юйретеди, энди аланы Новороссийскни «Черноморец» эм Волгоградны Леонид Слуцкийни атын жюрютген школуну келечилери бла оюнла сакълайдыла, деп билдиредиле республиканы Спорт министерствосундан.
Эсгертиу: ЮФЛ Юг лига СКФО-ну бла ЮФО-ну футбол школларыны 2007 жылда туугъан спортчуладан къуралгъан командаларыны араларында бардырылады. Лиганы Футболдан россейли союз 2022 жылда къурагъанды, ол жаш тёлю лиганы бёлюмлеринден бириди.
