РусГидро компанияны эмда «Сабий китапны юйю» Фондну башламчылыкълары бла басмаланнган «Сейирлик Узакъ Восток» деген китапны бетлерине гитчелеге, тамата тёлюге да тийишли хапарла бла очеркле тюшгендиле. Аны бёлюмлери жаныуарлагъа, битимлеге, геологиягъа, минерологиягъа, ол регионну тарыхына эмда анда болгъан магъаналы ишлеге жораланадыла. Кёп болмай аны презентациясы Нальчикде онунчу номерли китапханада ётгенди. Компания энчи айырып аны нек сайлагъанды деп сорсагъыз а, «Маданият» миллет проектге Нальчикде эм биринчи болуп ма ол къатышханы ючюн, дегендиле РусГидрону Къабарты-Малкъарда бёлюмюнде.
Бу проектни хайырындан жангыртылгъан китапхана эшиклерин окъуучулагъа ачханды. Ол кеси да шахарны быллай учрежденияларыны Ара системасына киргени себепли, ары берилген «Сейир Узакъ Восток» китапланы бир кесегин энтта да оналты библиотекагъа юлеширикдиле.
Аны презентациясына библиотекаланы келечилери, школчула да чакъырылгъан эдиле. Къонакълагъа компанияны, республиканы тийресинде орналгъан гидроэлектростанцияланы юслеринден кёп хапар айтхандыла. Башхаладан тири, кеслерини да хар неге сейирлери болгъан школчула уа быллай китап бла саугъаланнгандыла. Учрежденияны башчысы Амина Бажева, энергетиклеге ыразылыгъын билдирип, экология жаны бла жарыкъландырыу ишни бардырыугъа ала мындан арысында да къатышырыкъларына ышаннганын белгилегенди.
Кесини жандауурлукъ программасыны чеклеринде компания ол Фонд бла бирге тогъуз илму эмда художестволу китап басмалагъанды. Аны проектини баш магъанасы – ёсе келген тёлюню къыралыбызны тарыхына, илмуда эмда техникада жетишимлеге, инженер усталыкъгъа, саулайда энергетикагъа сейирин къозгъауду.
Улбашланы Мурат
хазырлагъанды.