КъМР-ни Башчысы   Казбек Коков РФ-ни Президентини Шимал-Кавказ федерал округда толу эркинликли келечиси  видео связь амал бла бардыргъан жыйылыуну советине къатышханды.  Жыйылыугъа РФ-ни МВД-сыны Шимал-Кавказ федерал округда баш управлениясыны таматасы Сергей Бачурин, Юг аскер округну къуралыу эм мобилизация иш бла штабыны башчысыны орунбасары - управленияны таматасы Константин Запатоцкий, округну субъектлерини оноучулары эм советни келечилери къатышхандыла.
Кесини докладында Юрий Чайка Россей Федерацияны Президенти  «Россей Федерацияда жарым мобилизацияны бардырыуну юсюнден» деген  указында салгъан борчха ат башындан къарамазгъа кереклисин чертгенди.
Юрий Чайка аскерге чакъыргъан комиссияла ачыкъ ишлерге керекдиле эм инсан обществону жорукъларына таяныргъа борчлудула, дегенди. Къыралны Башчысыны округда келечиси аскерге чакъырылгъанланы юйюрлерин психология жаны бла болушлукъ этерге телефон бла ишлеген «исси ызланы» эм болмачы хапарланы жайгъанлагъа да къажау ишни къураргъа буюргъанды.
Жыйылыуну кезиуюнде округну субъектлеринде орналгъан къоруулау-промышленность комплексге кирген предприятияланы ишлерин тыйгъычсыз бардырыу бла байламлы соруула сюзюлгендиле. 
Къабарты-Малкъар Республиканы оноучусу Шимал-Кавказ федерал округда Россей Федерацияны толу эркинликли келечисине РФ-ни Президентини указы республикада къалай толтурулгъаныны юсюнден билдиргенди.  
Юрий Чайка билдиргеннге кёре, сагъынылгъан соруу бла байламлы власть органланы битеу келечилери бирлешип ишлерча оноула этилликдиле. «Къуллукълада тургъанла ишни тийишлисича къураууна энчи жууаплыдыла», - деп белгилегенди РФ-ни Президентини СКФО-да толу экринликли келечиси.