«Моя провинция» деген битероссей фестиваль тюнене «Синдика» къонакъ юйде саугъалау бла бошалгъанды. Анга аталгъан къууанчлы жыйылыугъа Ара  телевиденияда бериулени бардыргъан Алла Данько бла Евгений  Кочергин, Россейли телевиденияны академиясыны члени Ирина Ховенко, жазыучу Татьяна Снежко, РФ-ни Журналистлерини союзуну председателини орунбасары, жюрини таматасы Александр Вишневецкий, фестивальны президенти эм къураучусу  Елена Фоминых, КъМР-ни  культура министри Мухадин Кумахов, башха жууаплы къуллукъчула да къатышхандыла.

Фестивальны баш номинациясы уа «Жер башында мамыр жашау ючюн» деген темагъа жораланнганды. Кеслерини ишлеринде журналистле Украинада бусагъатда бардырыла тургъан энчи аскер операциягъа къатышхан, Донецк эмда Луганск халкъ республикаланы эркинликлери, мамыр жашаулары ючюн жанларын–къанларын аямай сермешген аскерчилени, офицерлени юслеринден хапарлагъандыла. «Хар ишлерине бизни коллегаларыбыз жюреклеринден юлюш этгендиле»,-дегенди  Елена Фоминых, алагъа багъа биче.
Александр Вишневецкий а телевизор сюжетлеге ким да шумсуз къарагъанын, радио бериулеге да ма алай тынгылагъанларын чертип айтханды. «Аланы хар бири да тарыхны, бусагъатда  анда бола тургъан  ишле бла байламлы  затланы юсюнден тынгылы да, керти да хапар айтадыла. Жыл сайын  бу фестивалгъа къатышханла коллегаларына алада болгъан жангычылыкъланы юслеринден билдиредиле», – дегенди.
Алла Данько уа,  быллай фестивальла миллетлени, адамланы, динлени да бирикдиргенлерин чертип, республиканы оноучуларына, КъМР-ни Культура министерствосунда ишлегенлеге да жюрек ыразылыгъын билдиргенди.    
Евгений Кочергин а Чирик кёлню, Чегем чучхурланы да кёрюп, шахарны айбат жерлеринде да болуп, аны сюйюп къойгъанын билдиргенди. «Хар къалайда да бизге мында жарыкъ тюбегендиле, сизни республикагъыз аламат къонакъбайлыкъ эте билгенин кесибизде сынагъанбыз»,-дегенди.
«Жюрегибизни бир кесегин мында къоюп барабыз», - деген сёзлени фестивальгъа къатышханла барысы да къатлагъандыла.
Сёлешиуледен сора хычыуун жумуш  да башланды. Энчи белгиленнгенлеге ахча саугъала, жангы 2023 жылны аллында Великий Устюгда бардырыллыкъ  къууанчлагъа, Адыг бишлакъны байрамына, Кийиклени чабыууллукъларына, дагъыда кёп башха  байрамлагъа барыргъа, энчи курсланы ётерге да сертификатла берилгендиле.
Саугъаланнганла кёп эдиле, болсада мен жаланда бирлерин энчи белгилерге сюеме. Къарачай-Черкесден «День республики», «Къарачай», «Абзашта», «Ногай давысы», «Черкес хэку» газетледе ишлеген журналистле «Кунацкая» деген темагъа жазгъан материаллары ючюн белгиленнгендиле.
«Репортаж с колес» деген номинациягъа къатышханла къысха заманны ичинде Къабарты-Малкъар Республиканы 100-жыллыгъына жоралап, фильм алыргъа керек эдиле. Ма ол ишде Богородск телевидениядан  Анна Сычёвагъа  жетген болмагъанды. Ол къызчыгъы бла Чирик кёлню жагъасында айланнганларыны юсюнден фильм къурашдыргъанды.
КъМР-ни Культура министерствосуну, «КБР-Медиа» учрежденияны, РФ-ни Журналистлерини союзуну  къыйынларына да бийик багъа бичилгенди.
Къууанчлы жыйылыуну ахырында сёлеше, КъМР-ни культура министри Мухажин Кумахов быллай магъаналы форумну бардырыргъа бизни республиканы сайлагъанлары ючюн РФ-ни Президентини СКФО-да толу эркинликли келечиси Юрий Чайкагъа эмда фестивальны президенти Елена Фоминыхге ыспас этгенди.  Республика не заманда да  къонакълагъа эшиклерин кенг ачып тургъанын да айырып айтханды.

Холаланы Марзият.