«Солургъа Къабарты-Малкъарны курортларын сайлагъан тыш къыраллы туристлеге кёпден-кёп къошула барады. Былтыр аланы саны миллионнга жетгенликге, быйылны биринчи жарымында окъуна республикагъа 550 мингден аслам турист келгенди», - дегенди КъМР-ни Башчысы Казбек Коков.
Бюгюнлюкде «Эльбрус» курортха сейир артыкъда уллуду. Анда тау лыжалада учар кезиу былтыр декабрьде башланып, жети айгъа созулгъанды эмда озгъан баш кюн битеуроссей эришиуле бла бошалгъанды. Алада баш саугъа – КъМР-ни Башчысыны кубогу - Мурманск областьны командасына жетгенди.
Бузланы хайырындан «Эльбрус» курортха келгенле жайда окъуна лыжалада учаргъа онг табадыла. Жети айны ичинде Минги тауну тийресинде канат жолла бла 500 минг чакълы бир адам кётюрюлгенди. Ала табийгъатны тамашалыгъына къарагъандыла, лыжалада да учхандыла. Июльну ахырына дери Элбрусда Россейни фристайлдан, тау лыжаладан бла сноуборддан жыйымдыкъ командаларыны спортчулары жарауларын бардырлыкъдыла.
«Бийикликледе хауа болумла россейли командалагъа жарауларын дайым да бардырыргъа онг бередиле. Бюгюнлюкде Минги тауну тийресинде россейли спортчуланы спортну тюрлю-тюрлюлерине кёре хазырларча база къурауну юсюнден федерал къуллукъчула бла сёлешине турады», - деп чертгенди Казбек Коков.
Туристлени саны ёсюп баргъаны бла байламлы къонакъ юйледе отоуланы да кёбейтиуню, ол жаны бла башха башламчылыкълагъа да себеплик этиуню, ол санда солугъанланы жумушларын жалчытыуну игилендириуню къайгъысын да кёрюрге тюшеди. Россейни Правительствосуну оноуу бла Къабарты-Малкъаргъа туризм жаны бла проектлеге болушлукъгъа 250 миллион сомдан артыкъ бёлюннгенди.
Аны алыр ючюн бардырылгъан конкурсха къатышыргъа 60-дан аслам заявка берилгенди. Алай бла, кемпинглени, модуль эмда гитче къонакъ юйлени талайын къураргъа белгиленеди.
Туризмни айнытыуну чеклеринде къонакъ юйлеге да энчи эс бурулады. Сёз ючюн, Кавказ.РФ этген ахыр инвестиция келишимледен бири «Эльбрус» курортну тийресинде «AZIMUT Hotels» къонакъ юйлени талайын ишлеу бла байламлыды. Проектни багъасы миллиард сом чакълы бирди. Аны 2026 жылда тамамлап бошаргъа белгиленеди.
«Эльбрус» курортха 2024 жылгъа дери этиллик инвестиция салымла 15,2 миллиард сомну тутадыла. Минги тауну тийресин айнытыуну жумушларына инфраструктура къурулуш да киреди. Мында 800 машина тохтарча майдан ишлене турады, жангы лыжа эмда канат жолла тартылып башланнгандыла. Аладан сора да, коллекторну къурулушу да барады, бу проектге Элбрус эл да киреди. Анда дагъыда жангы больница ишленип башланнганды. Аны къурулушу саулукъ сакълауну биринчи болушлукъ берген бёлюмюн жангыртыуну чеклеринде бардырылады. Больницаны мурдорунда травматология ара бла аллергология бёлюм къураллыкъдыла.
Тау лыжа трассала жабылгъанлыкъгъа, туристле канат жолла бла тенгизден 3 847 метрге дери бийикликге кётюрюледиле, спорт эмда солууну тири тюрлюлери бла да кюрешедиле, Къабарты-Малкъарны башха курортларында да хал алайды. «Бызынгы» альплагерьде бу кюнледе Россейни альпинизмден чемпионаты ётеди. Анга Россейни тогъуз субъектинден 13 жыйымдыкъ команда къатышады. Таугъа ёрлерни аллында спортчула бийик тау хауагъа юйренедиле. Уста альпинистлени уа Баш Кавказ хребетни бек бийикде орналгъан 13-километрлик Бызынгы къабыргъасы кесине тартады. Кавказны бешминглик тау тёппелери да ма мындадыла: Дых тау (5 204 м), Коштан тау (5 152 м), Мижирги (5 025 м), Шхара (5 068 м), пик Пушкина (5 033 м) эмда Жангы тау (5 058 м).
Чегем районда «Чегем» саулукъландырыу лагерьни къурулушу да къыстау барады. Туризм бла байламлы проектле Зольск районда да бардырыладыла. Мында «Эко-парк «Долина Нарзанов» комплекс ишлеп турады. Черек районда да туризм айныйды, Жангы объектле ишленедиле, Аушигерде, Огъары Чирик кёлде бла Огъары Малкъарда эскилери жангыртыладыла.
«Къабарты-Малкъарда туризмни андан ары айнытыуну хайыры уллу боллугъу баямды. Бюгюнлюкде окъуна ол жангы ишчи жерле береди, андан республиканы бюджетине иги кесек файда тюшеди. Аны хайырындан солурча жерлери болгъан районланы социал-экономика айныуларына жангы онгла ачыладыла», – деп чертгенди КъМР-ни Башчысы Казбек Коков.
КъМР-ни Башчысыны бла Правительствосуну
пресс-службасы.
