Къабарты-Малкъар Республиканы Башчысы Казбек Коков Россей Федерацияны Миллет гвардиясыны Шимал-Кавказ округ аскерлерини командующийи генерал-лейтенант Сергей Захаров бла Къабарты-Малкъардан барып энчи аскер операцияны кезиуюнде жан берген аскерчилени жууукъларына аланы къырал саугъаларын бергенди.

Россей Федерацияны Президенти В.В. Путинни 2022 жылда 14 мартда чыгъарылгъан Указына тийишлиликде аскер эм ишчи борчларын толтургъан кезиуде кёргюзтген кишиликлери, батырлыкълары эм кеси кеслерин аямай кюрешгенлери ючюн ёлгенден сора Кишиликни ордени бла алты аскерчи саугъаланнганды: Кёнделен элден полицияны кичи сержанты Бачиланы Къурманбийни жашы Алим, Нальчик шахардан полицияны тамата сержанты Гехов Альберт Русланович, Баксанёнок элден полицияны тамата лейтенанты Калажоков Ренат Русланович, Кенже элден полицияны подполковниги Кештов Аслан Сафарбиевич, Огъары Акъбаш элден полицияны майору Кудаев Ратмир Хабалович, Яникой элден прапорщик Этезланы Хамитни жашы Ануар.

Казбек Коков ауушхан аскерчилени жууукъ-ахлуларына былай айтханды: «Бизни къарындашларыбыз Россей къыралны сейирлерин, сабийлерибизни тамблагъы кюнлерин намыслары-сыйлары, кишиликлери бла къоруулагъандыла. Ала бийик сёзле тюйюлдюле. Аланы жигитликлери болмаса, ол болумла Россей Федерацияны жеринде боллукъ эдиле. Аланы атлары ёмюрледе сакъланырыкъды, уланларыбызгъа махтау. Сиз тийишли жашла ёсдюргенигиз ючюн аллыгъызда баш иебиз. Къабарты-Малкъарны эм Россей къыралны тарыхында жерлешлерибизни атлары ёмюрледе да унутуллукъ тюйюлдюле. Аллыгъызда баш урабыз».

Сергей Захаров жан берген аскерчилени батырлыкъларыны юсюнден айтып, ала биринчи аскер къаршчылыкъгъа жигит тюбегендиле, кеслерине къоркъуу болгъанына къарамагъанлай, артха турмагъандыла, дегенди. «Кеслерини аскерчи тенглерин эм битеу Ата журтубузну къоруулар ючюн жашауларын аямагъандыла. Ата-аналарына, юй бийчелерине, жашларына аталарыны жигитликлери ючюн уллу ыразылыкъны эм битеу жюрекден бушуу этгенибизни билдиреме. Биз барыбыз да эсде тутарыкъбыз, сабийлерибиз, туудукъ-учхунларыбыз да унутурукъ тюйюлдюле», - деп чертгенди ол.