Бу кюнледе «Эдельвейс» клубда «Барыбыз да биргебиз!» деген ат бла «тёгерек стол» бардырылгъанды. Тёреге айланнган бу магъаналы иш жаш адамланы араларында шуёхлукъ байламлыкъланы бютюн кючлер мурат бла къуралады.
«Тёгерек столгъа» Нальчикде билим бериу департаментни сабий эмда жаш тёлю чыгъармачылыкъ арасыны директору Зокъаланы Даниял, «Боевое братство» битеуроссей жамауат организацияны Къабарты-Малкъарда бёлюмюню башчысы Гелястанланы Барисбий, урушну бла урунууну ветеранларыны Нальчик шахар советини таматасыны орунбасары Владимир Абаноков, сабий жамауат организацияланы башчылары да къатышхандыла.
Ёсюп келген тёлюню патриот ниетде, миллет, дин айырыулукъ болмай жашаргъа юйретиуге эмда тарых магъаналы ишлени эсде тутарча этиуге жораланнган бу ушакъгъа Нальчикде 11-чи, 19-чу, 31-чи, Акъ-Сууда 15-чи, Кенжеде 20-чы номерли мектеплени окъуучулары чакъырылгъандыла. Хасания элден а ары Фрийланы Рамазанны атын жюрютген 16-чы номерли мектепни 10-чу «А» классыны окъуучулары Гайыланы Лейля, Башийланы Дарина устазлары-юйретиучюлери Улбашланы Джамиля Алиевна бла бирге келгендиле.
Устазла сабийлени юйретиу жаны бла къаллай ишле тындыргъанларыны юсюнден тынгылы билдириуле этгендиле, окъуучула уа республикада жашагъан миллетлени араларында байламлыкъланы юслеринден докладларын окъугъандыла.
Келген къонакъла да кёп миллетли Къабарты-Малкъарда адамла бир бирлери бла шуёхлукъда жарашып жашагъанларыны юсюнден кёп юлгюле келтирип хапарлагъандыла. Къысхасы, «Биз барыбыз да миллетибизге, тутхан динибизге къарамай, биригип, бир бирибиз бла келишип жашасакъ, не къыйынлыкъланы да хорларгъа къолубуздан келликди», деген оюм сёлешиулени баш магъанасын тутхандыла.
Ол кюн окъуучула, абаданла да Украинада бара тургъан энчи аскер операциягъа къатышханлагъа, бек алгъа уа жерлешлерибизге, кёллендириу сёзле бла письмола жазгъандыла.
Тюбешиуню ахырында уа устазлагъа билим бериу департаментни атындан сертификатла берилгендиле, докладла этген школчула уа грамотала, бюсюреу къагъытла бла саугъаланнгандыла.
Холаланы Марзият.
Суратланы автор алгъанды.