Кёпжыллыкъ битимлени орнатыуну юсюнден айтханда, Къабарты-Малкъар республика арт кезиуледе саулай Россейде алчы беш регионну санына киреди. Былтыр бизде кёгет терекледен бла наныкълы юлкюледен 1,5 минг гектар жангы бахчала къуралгъандыла. Буруннгу жыл бла тенглешдиргенде, ол 120 гектаргъа аслам болгъанды. КъМР-ни Эл мюлк министерствосунда белгилегенлерича, бахчаланы бары да терк эмда эм терк айныгъан технологияла бла къуралгъандыла.

Саулай алып тергегенде, бюгюнлюкге быллай бахчаланы ёлчеми 24570 гектар болады. Терекле тириле баргъаны сайын, тирлик да кёбейе барады. Буруннгу жыл бла тенглешдиргенде былтыр 3,5 процентге асламыракъ жемиш эм наныкъ жыйылгъанды. Ол кеси да 535,5 минг тоннады.

Сабанлада иш къазауатды

Башха жерледеча,Зольск районда да аграрийле, сабанлагъа чыгъып, урлукъ себип башлагъандыла. Муниципалитетни жер-жерли администрациясындан билдиргенлерине кёре, бюгюнлюкге 70 гектарда арпаны, 34 гектарда зынтхыны, онбир гектарда уа мал ашха жараулу битимлени урлукълары себилгенди. Саулай айтханда уа, жазлыкъла 600 гектарда ёсдюрюллюкдюле.

Районда кюзлюкле да битедиле. Ала битеуда 2500 гектарны аладыла. Шёндюледе аланы семиртгичле бла байыкъландырыу иш барады. Ол кеси да жюз гектарда тамам этилгенди.

Аграрийлеге учуз кредитле

Битимчиликде къармашханлагъа себеплик этерча, РФ-ни Правительствосу къошакъ халда ахча бёлгенди. Жаз башында урлукъ себиу кезиу башланнганда, аграрийле льготалы кредитлени бек излейдиле. Аны хайырындан ала кёп тюрлю ишлерин тындырадыла, производстволарын кенгертирге амал табадыла. Алай бла Правительствону оноуу бла энтта да беш миллиард сом бёлюннгенди.

Улбашланы Мурат хазырлагъанды.