Хэти къыгурыIуэ къыщIэкIынщ цIыхум и хуитыныгъэхэмрэ щхьэхуитыныгъэмрэ къызэпызыуд Iэмалу экстремизмэмрэ терроризмэмрэ зэрыщытыр. IэщIагъэлIхэм зы жьэу жаIэ щIэблэр зэфIэувэн щыщIидзэм, нэгъуэщIу жыпIэмэ щысабийм щегъэжьауэ, зи гугъу тщIы Iуэхухэм ахэр щыхъумэным, цIыху гъащIэр абыхэм зэракъутэр къагурыгъэIуэным иужь зэритыпхъэр.
НыбжьыщIэхэм ящIэн хуейщ террорым нэпс, гуауэ къызэрихьыр. ЯщIэ къудей мыхъуу, зым адрейм пщIэ хуищIу псэуным и мыхьэ- нэр зыхуэдэр зыхащIэу къэгъэтэджыныр псом япэщ. Зи гугъу тщIым гулъытэ щыхуащI КъБР-м Экстремизмэм пэщIэтынымрэ щIалэгъуалэ политикэмрэ япыщIа лэжьыгъэхэр щIыпIэхэм щызэгъэуIунымкIэ и министерствэм. Абы и зы щапхъэ Iуэхугъуэ иджыблагъэ щекIуэкIащ Кыщпэк курыт еджапIэм.
«Зэхуэдэхэм я зэпсэлъэныгъэ» урысейпсо Iуэхум хыхьэу, щIалэгъуалэм яIущIат КъБР-м экстремизмэм пэщIэтынымрэ щIалэгъуалэ политикэмрэ япыщIа лэ-жьыгъэхэр щIыпIэхэм щызэгъэуIунымкIэ и министр Къуэшырокъуэ Залым. А Iуэхум хэтащ Бахъсэн районым и Iэтащхьэм хабзэхъумэ IэнатIэхэм ядэлэжьэнымрэ Iулъхьэм пэщIэтынымкIэ и къуэдзэ Тохъутэмыщ Мухьэмэд.
ЗэIущIэр лъэныкъуитIым я дежкIи гупсэхуу екIуэ-кIащ. СыхьэтитIым щIигъукIэ зэбгъэдэсахэм я гукъеуэ зэхуаIуэтащ. Куэдым щIэупщIащ щIалэгъуалэр: дуней псор зыгъэгулэза пандемием, Хэку зауэшхуэм, Къэбэрдей- Балъкъэрым и илъэси 100-р зэригъэлъэпIэнум, нэгъуэщIхэми. Ауэ псом хуэмыдэу ныбжьыщIэхэр нэхъыбэу зыщIэупщIар республикэми нэгъуэщI къэралхэми терроризмэмрэ экстремизмэмрэ зэрыщыпэщIэт щIыкIэрт.
Къуэшырокъуэр тепсэлъыхьащ цIыхухэр щIэпхъаджагъэм хуэзышэ гупсысэхэр нэхъыщхьэу къызыхэкIым. Абы ныбжьыщIэхэм яжриIащ иджыпсту щIалэгъуалэм я нэхъыбэм унагъуэмрэ школымрэ зыхуаущиир IэщIыб ящIурэ я Iуэху еплъыкIэхэр социальнэ сетхэм щатххэм елъыта зэрыхъур.
- ЩIэпхъаджагъэхэм уа-зэрыпэщIэтыфыну Iэмалхэм я нэхъыфIыр апхуэдэ-хэр къэмыгъэхъуным уте- лэжьэнырщ. Абы и лъэныкъуэкIэ псом нэхъыщхьэу зыдэлэжьэн хуейуэ къэслъытэр зи Iуэху еплъыкIэ-хэр зэфIэувэн щIэзыдзэ ныбжьыщIэхэрщ, сыту жыпIэмэ щхьэусыгъуэ зэхуэмыдэхэм къыхэкIыу Iуэхугъуэ зэIумыбзхэм хохуэ щIалэгъуалэр, - къыхигъэщащ Къуэшырокъуэм.
Абы щIалэгъуалэм яжриIащ щIэныгъэрэ IэщIагъэрэ зрагъэгъуэтыным нэхъыфI я щхьэм зэрыхуамыщIэфынур икIи дэтхэнэми ехъуэхъуащ я мурадыфIхэр къехъулIэну.
Гу зэрылъыттащи, мыпхуэдэ зэхуэзэхэр щIэх-щIэхыурэ щIалэгъуалэм ядебгъэкIуэкIыныр щхьэпэщ. Апхуэдэ зэIущIэхэм цIыху пажэхэр, IэщIагъэлIхэр, зыдэплъеину нэхъыжьыфIхэр ирагъэблагъэмэ, шэч хэмылъу, фIы къыдэкIуэнущ.
БАГЪЭТЫР Луизэ.