ТЭТЭРЩ ИКIИ МУСЛЪЫМЭНЩ![]() Урысейм и мызакъуэу, дуней хъурейм цIыху куэд къытена къыщIэкIынтэкъым Пекин щекIуэкIа мыгъэрей Олимпиадэм фигурнэу къэжыхьынымкIэ хэта Валиевэ Камилэ абы къыщигъэлъэгъуа зэфIэкIымрэ гугъу зэрыщехьамрэ я хъыбар зэхимыхауэ. Пщащэр зэхьэзэхуэм адэкIи хэтынрэ хэмытынрэ зэхагъэкIыху, къытезэрыхьа бэлыхьымрэ цIыху гулъытэ егъэлеямрэ гугъу ирагъэхьащ. А бэлыхьыр нэхъ псынщIэ щищIын папщIэт гуп къыхэхам и гъусэу Олимпиадэм здашауэ къыщIэкIа протоиерей Алексеев Андрей Валиевэ Камилэ щIыхуэзар. «Дэ зэадэзэпхъу хуэдэу хъарзынэу дызэпсэлъащ», - хэIущIыIу ищIащ иужькIэ дин лэжьакIуэм хъыджэбз цIыкIум щIэгъэкъуэн зэрыхуэхъуар. УФ-м и Муслъымэнхэм я IуэхущIапIэм и унафэщIым и япэ къуэдзэ Мухетдинов Дамир а Iуэхум щытепсэлъыхьым къыхигъэщащ Олимпиадэм муслъымэн щыхэткIэ, абы ислъам дин лэжьакIуи здашэныр нэхъ зэрыекIур. Къэхъуам Мухетдинов Дамир щытепсэлъыхьащ и фейсбук напэкIуэцIым: «Мы махуэхэм апхуэдизу гугъу ехьа, муслъымэн унагъуэм къыхэкIа Валивэ Камилэ чыристан духьэшы зэрепсэлъам дэ къыджиIэр IуэхугъуитIщ: 1) Олимпиадэм щыIэ ди спортсменхэм православ дин лэжьакIуэ я гъусащ. 2) Урысейм диниплI щызекIуэрэ пэт, чыристанхэм къинэмыщIа, нэгъуэщI динхэм къабгъэдэкI лIыкIуэ Пекин здашакъым. Урысейм ис муслъымэнхэм къахь медалхэр адрейхэм ейхэм нэхърэ мыхьэнэкIэ нэхъыкIэу пIэрэ, жытIэу дгъэув упщIэм и жэуап дгъуэтыну къыщIэкIынкъым». Сурэттеххэм я зым къиубыдащ Камилэ мылым техьэн ипэкIэ духьэ ищIу и Iэхэр къызэриIэтар. И япэ текIуэныгъэр хъыджэбз цIыкIум хуигъэфэщащ дунейм зэрехыжрэ куэд мыщIа и анэшхуэм. ЧЭРИМ Марианнэ.
Поделиться: ЧИТАТЬ ТАКЖЕ:
|