Ди гъащIэм сыт щыгъуи увыпIэ лъагэ щызыубыд IэщIагъэ, щIэныгъэ куэд щыIэщ. Абыхэм ящыщщ архитектурэр. Ди республикэм и Iэтащхьэ КIуэкIуэ Казбек и унафэкIэ 2024 гъэр Архитектурэм и илъэсу ягъэуващ.
БлэкIар наIуэу ди нэгу къыщIэзыгъэувэж ухуэныгъэхэмкIэ къулейщ Урысей Федерацэр. Апхуэдэхэр щымащIэкъым ди республикэми. Ахэр нэхъыбэж щIыным хьэлэлу хуэлажьэхэрщ зытеухуауэ щытар Мэлбахъуэ Тимборэ и цIэр зезыхьэ Лъэпкъ библиотекэм иджыблагъэ щызэхэта зэIущIэр. Ар къызэIуихащ мы IуэхущIапIэм и унафэщI, филологие щIэныгъэхэмкIэ доктор, Къэбэрдей-Балъкъэрым щIэныгъэхэмкIэ щIыхь зиIэ и лэжьакIуэ Емуз Анатолэ. Абы фIыщIэ яхуищIащ зэIущIэм кърихьэлIа архитекторхэмрэ а IэщIагъэм хуеджэхэмрэ. АдэкIэ и къэпсэлъэныгъэр нэхъыбэу зытригъэщIар архитектурэм и лэжьакIуэхэм мы гъэм зыхуагъэувыжа къалэнхэрщ. Емузым зэрыжиIамкIэ, гулъытэ хэха хуащIынущ лэжьыгъэм нэхъри зегъэужьыным, зыгъэпсэхуакIуэ ди деж къакIуэхэр дэзыхьэхын, гукъинэж дахэу къахуэнэн ухуэныгъэхэм хэгъэхъуэным.
АдэкIэ къэпсэлъащ техникэ щIэныгъэхэмкIэ доктор, профессор, Къэбэрдей-Балъкъэрым щIэныгъэхэмкIэ щIыхь зиIэ и лэжьакIуэ, Бэрбэч ХьэтIутIэ и цIэр зезыхьэ университетым илъэс 23-кIэ егъэджакIуэ нэхъыжьу, доценту, ухуэныгъэмкIэ факультетым и кафедрэм иужькIэ и унафэщIу щылэжьа, архитектурэмкIэ институтым и унафэщI Хэжь Анатолэ. Абы зэIущIэм кърихьэлIахэм ягу къигъэкIыжащ архитекторхэм я IэдакъэщIэкIхэу ди щIыналъэр зыгъэбжьыфIэ лэжьыгъэхэр, адэкIи къытеувыIащ мы IэщIагъэм нэхъри пщIэ, зэфIэкI ин иIэн папщIэ гу нэхъ зылъытапхъэу къилъытэхэм. И къэпсэлъэныгъэм иужькIэ упщIэ зиIэхэм жэуап яритыжащ.
ЗэIущIэм къыщыпсэлъащ республикэм щIыхь зиIэ и архитектор, архитектурэмкIэ институтым, КъБКъУ-м я доцент, ухуэныгъэмрэ дизайнымкIэ факультетым и деканым и къуэдзэу илъэс куэдкIэ щыта Бжьахъуэ Музариб. Езым иригъэджауэ IэщIагъэлI нэс хъуахэм, ехъулIэныгъэ яIэу егъэджакIуэу нобэ къыдэлажьэхэм фIыщIэ ин яхуищIащ икIи я зэфIэкIым зэрыригушхуэр къыхигъэщри, адэкIи хагъэхъуэну ехъуэхъуащ. Абы зэфIагъэкIа лэжьыгъэхэмрэ мурадхэмрэ зэIущIэм къекIуэлIахэр щыгъуазэ ищIащ.
Налшык къалэм и архитектор нэхъыщхьэ, къалэ администрацэм и унафэщIым ухуэныгъэмкIэ и къуэдзэ, щIалэщIэми, зэфIэкI ин иIэу къалъытэ Быдэ Аслъэн и къэпсэлъэныгъэри гъэщIэгъуэнт. Архитектурэм, ухуэныгъэм хуеджауэ диплом зратахэм къыхаха IэщIагъэр IэщIыб зэращIыр игу къызэреуэмрэ а лэжьыгъэм щIалэгъуалэр дегъэхьэхын, хуэфащэ пщIэ егъэгъуэтыжын папщIэ хэкIыпIэ къэгъуэтынымрэщ ар нэхъыбэу къызытеувыIар.
ЗэIущIэм кърихьэлIа хьэщIэхэр къэпсэлъа иужь, библиотекэм и лэжьакIуэхэм Iуэхур зытеухуам къыхузэрагъэпэща гъэлъэгъуэныгъэхэм ирагъэплъащ.
ШАФИЙ Аслъэн.
