Казбек Коков КъМР-ни Правительствосуну Председатели Мусукланы Алийни, КъМР-ни Башчысыны Администрациясыны таматасы Мухамед Кодзоковну, Россейни МЧС-ини КъМР-де Баш управлениясыны начальниги Михаил Надежинни, КъМР-ни Правительствосуну Председателини орунбасары Марат Хубиевни, КъМР-ни Башчысыны бла Правительствосуну ишлерини управляющиси Азаматгери Ашхотовну къатышыулары бла оператив кенгеш бардыргъанды.

КъМР-ни Башчысы Къабарты-Малкъар Республика Шимал-Кавказ федерал округну башха субъектлери бла бирге юйлерин къоюп кетерге тюшген адамланы алыргъа хазырланнганыны юсюнден билдиргенди эмда Правительствогъа ДНР-де бла ЛНР-де жашап тургъан жерлеринден кетерге тюшген адамлагъа болушургъа, ала болжаллы халда орналырча мадарла этерге буюргъанды.

Казбек Коковну оноуу бла ал кезиуде Донецкден бла Луганскдан 400 къачхынчыны алыргъа беш санаторий хазырлана турады: «Курорт «Нальчик», «Вершина»,  Б.Э. Калмыков атлы, «Кавказ», «Долинск». Ундурукъланы къошакъ саны да эсге алынырыкъды. Роспотребнадзорну КъМР-де Управлениясы бла КъМР-ни Саулукъ сакълау министерствосу къачхынчылагъа медицина болушлукъ бериуню мадарларын этедиле, КъМР-ни Жарыкъландырыу, илму эмда жаш тёлюню ишлери жаны бла министерствосу уа сабийлени республиканы билим бериу учрежденияларында окъутууну онгларын тинтедиле.

Бу кюнледе республика гуманитар болушлукъну 20 тоннасын хазырлай турады. Ары аш-азыкъ хуржунла эмда бек керекли затла киредиле. Аланы жыйыуну «Единая Россия» партияны регион бёлюмю къурагъанды. Тамбла гуманитар жюкню Дондагъы Ростовха жиберликдиле. Анда уа ол къачхынчыланы араларында юлешинирикди.