«Информация технологияла бёлюмню айнытыу-ол экономиканы тутхучлу боллугъуна эмда адамланы жашауларын игилендирирге себеплик этеригини юсюнден къауум кере айтханма. Ол жаны бла Къабарты-Малкъарда бек магъаналы проектледен бирине, Россей Федерацияны Правительствосуну Председателини  Михаил Мишустин къол салгъан проект Шимал-Кавказ федерал округну айнытыу программасына киргенди эмда Нальчикде ИТ-парк къураллыкъды.

 Белгиленнген планнга кёре, ИТ-паркда онла бла инновациялы предприятияла къураллыкъдыла, бийик квалификациялы программистлеге бек аздан  450 ишчи жер боллукъду. Бюгюнлюкде ол проектни къурау бла байламлы инфраструктура ишле бардырыла турадыла. Федерал ара бла келишип, ИТ-паркны бир бёлюмюн Х.М.Бербеков атлы Къабарты-Малкъар къырал университетни къатында орнатыргъа оноулашханбыз.

Дагъыда ИТ-паркда ишлериклени орнатыу бла байламлы башха соруугъа къаралгъанды, Ленина бла  Тарчокова атлы орамла бирге къошулгъан жерде ишлене тургъан мекямда боллукъду парк. Анда дагъыда Республикалы кёп функциялы ара эмда «Къоркъуусузлу республика» деген къырал учреждение орналлыкъды.

Сагъынылгъан мекям он жылдан аслам кезиуню къурулушу бошалмай тургъанды, энди ол Нальчикни омакъ юйлеринден бири боллукъду, бек башы уа республикада жашагъанлагъа хайыр келтирип турлукъду», - деп билдиргенди КъМР-ни Башчысы Казбек Коков кесини телеграм каналында.