КъМР-ни Башчысы Казбек Коков бардыргъан кезиулю «муниципал сагъатда» сёз республикада эпидемиология халны, муниципал тийреледе миллет проектле къалай толтурулгъанларыны эмда башха магъаналы ишлени юслеринден баргъанды. Аладан билдириуле бла КъМР-ни Правительствосуну Председатели Мусукланы Алий, аны биринчи орунбасары Муаед Кунижев, КъМР-ни саулукъ сакълау министри Рустам Калибатов сёлешгендиле.
-Биз сакълагъаныбызча, бюгюнлюкде бизде бир сутканы ичинде коронавирусдан ауругъанланы саны 500-ге жете келеди. Аланы асламысына амбулатория амал бла багъылады. Биз бу болумгъа хазыр эдик: тест-системаланы, дарманланы алгъындан алып бошагъанбыз, жангы контакт- араны ачханбыз. Школчуланы солургъа жибергенибиз аурууну жайылгъанын бираз селейтгенди. Биз тест тинтиулени да кёбейтгенбиз. Контакт-арада операторланы санын да ёсдюргенбиз. Къоркъуулу аурууладан бакъгъан госпитальлада ишлегенлеге хакъларын толусунлай тёлегенбиз, саулукъ сакълауну системасына тутхучлулукъ этебиз. Къысхасы, халны осалландырмазгъа къолубуздан келеди,-дегенди Къабарты-Малкъарны Башчысы.
Республикада амбулатор амал бла 13 659 адам багъылады. Саулукъ сакълауну министри билдиргеннге кёре, жаланда февральда аллай саусузланы 20 мингден асламы дарманла бла жалчытылыннганды. ОРВИ эмда коронавирусдан ауругъанланы саны бир суткагъа минг адамгъа жетеди. Кюн сайын 4 минг чакълы тест этиледи. Госпитальлада 1285 ундурукъ барды, аладан 1031 бош тюйюлдюле. 417 саусузгъа кислород болушлукъ керекди. Кюн сайын госпитальлагъа 110-нга жууукъ саусуз тюшеди, аллай бир да сау болуп чыгъады. Реанимациялада 95 адам жатады.
Рустам Калибатов дарман салдыргъанла коронавирусну къалай кётюргенлерини юсюнден да билдиргенди. Бюгюнлюкде госпитальлада багъылгъан 1031 адамдан 160-сы дарман салдыргъанладыла. Саусузланы 27-си бек къыйын ауруйду, аладан дарман салдыргъанла 6 процентни тутадыла. Аладан да 20 адам дарман салдыргъанлы 6 ай озгъанды. Вакцинация этдиргенли алыкъа жарым жыл болмагъанла аурууну женгил кётюредиле. Халкъгъа дарман салдырыу Зольск, Элбрус, Прохладна муниципал районлада бла Прохладный шахар округда башхаладан иги къуралгъанды.
Былайда республиканы оноучусу вакцинацияны андан ары бардырыуну магъанасы уллу болгъанын эсгертгенди. «Ол хайыр бергенин шартла кёргюзтюп турадыла. Муниципалитетле ол жаны бла ишлерин тирилтирге керекдиле. Пандемиядан къутулууну вакцинациядан башха амалы жокъду», - деп чертгенди Коков.
Сёз миллет проектлеге жетгенде, Мусукланы Алий быйыл алагъа кёре муниципалитетлени жерлеринде «Хар сабийни жетишими», «Маданият болум», «Чыгъармачы адамла», «Шахарда ырахат болум къурау» муниципал проектле толтурлукъларыны юсюнден билдиргенди. Алагъа ахча бёлюннгенди, ол муниципалитетлеге жиберилгенди. Биринчи мартха дери конкурсла къурау бла байламлы жумушла тамамланылыргъа керекдиле.
Казбек Коков жер-жерли администрацияланы башчыларына миллет проектле къалай толтурулгъанларына контрольну къатыландырыргъа, подряд ишле тынгылы болурларын сураргъа, керек болса жамауатны да болушдурургъа кереклисин эсгертгенди.
-Эсигизге салайым: келишимни заманында эмда тынгылы толтурмагъан жууапха тартылмай къаллыкъ тюйюлдю. Биз адамларыбызгъа тап болсун деп кюрешебиз, аны себепли иш тынгылы болурун излерге эркинбиз. Кесигизге файда тюшюрюр ючюн башхаланы тынчлыкъсыз этерге жарамайды. Ишни тынгылы эталмай эсегиз, аны къолгъа ала да турмагъыз. Мени оюмум алайды! -дегенди Казбек Коков.
Ахырында ол муниципал администрацияланы башчыларына март айны сакълап да турмай, кюнню халы игиленнгенине кёре, тийрелени тазалау жаны бла ишлени тирилтирге буюргъанды.
