Роспотребнадзорну Къабарты-Малкъарда управлениясында былтыргъы ишлерини эсеплерин чыгъаргъандыла. Ведомстводан билдиргенлерине кёре, ол кезиуде гражданла ары 403 кере сёлешгендиле эмда жазгъандыла. Аладан 60 проценти адамланы сатыу-алыуда эркинликлерин къоруулау бла байламлы эдиле. Къалгъанлары уа тюрлю-тюрлю жумушланы тамамлау бла.

Аланы барына да тийишлисича къаралгъанды. Андан сора да Управленияны специалистлери кёп тюрлю ишле эмда жумушла бла байламлы ангылатыу акцияла бардыргъандыла. Аланы кезиуюнде ведомствогъа соруулары бла сёлешген 120 инсаннга толу жууапла берилгендиле.

Гражданланы 79 соруулары неда тарыгъыулары бла байламлы бир талай тюкенде эмда жумушла жалчытхан жерде контроль-надзор ишле эмда тинтиуле бардырылгъандыла. Аланы кезиуюнде ачыкъланнган бузукълукъланы юслери бла 75 инсан административ жууапха тартылгъандыла.

Интернетде Роспотребнадзор къурап, хайырланыучуланы эркинликлерин къоруулау жаны бла информациялы ресурс барды. Гражданла анда ведомствону иши бла шагъырейленирге, магъаналы материалла да окъургъа боллукъдула.

Омарланы Мурат хазырлагъанды.