Кёп болмай Къабарты-Малкъар къырал университетде «Карьераны кюню» болгъанды. Аны кезиуюнде тамата курслада окъугъанла предприятияланы келечилери бла тюбеширге, тюрлю-тюрлю соруула берирге да онг тапхандыла.  Къонакъланы арасында КъМР-ни Парламентинде билим бериу, илму эм жаш тёлюню ишлери жаны бла комитетини таматасы Нина Емузова,  РФ-ни Илму эмда бийик билим бериу министерствосуну стратегиялы проектле жаны бла бёлюмюню аналитиги Эльдар Балкаров,  урунуу эмда социал къоруулау министерствону информация-аналитика бёлюмню таматасы Мадина Кожакова,  Пенсия фондну республикада бёлюмюню  энчи эм социал  страховка берген управлениясыны таматасыны орунбасары  Алим Макоев, Нальчикни 4-чю номерли гимназиясыны ингилиз тилден устазы Диана Болотокова эм башхала болгъандыла. 

Жыйылыуну ача, Нина Емузова жаш адамлагъа усталыкъны иги ойлап сайларгъа эм биринчи уа, неге да къарамай, иш кёллю адамла болурларын тежегенди. Ол айтханнга кёре, къоллары кёп тюрлю ишге жарагъан инсан не заманда да ишсиз къаллыкъ тюйюлдю.

Бирсиле да бусагъатда республикада педагогла, жаш тёлю бёлюм бла байламлы кадрла, саулай алып айтханда, гуманитарийле жетмегенлерин билдиргендиле.  Аны бла бирге жаш адамлагъа къоркъмай, салгъан жолларындан таймай барыргъа кереклисин эсгертгендиле.

Ратмир Коцев бир тюрлю иш башларгъа сюйгенлеге проектлерин хазырлауда болушлукъ тапдыраллыгъын эм эсгертиу берип себеплик тапдыраллыкъларын да къошханды.

Кристина Лопатина да «Факультетус» платформаны ишини юсюнден билдиргенди. Ахырында КъМКъУ-ну гуманитар институтну таматасы Муслим Тамазов да студентлеге иги специалистле болуп муратлары толурун эм жетишимлери бла къууандыра турурларын тежегенди.

Ол кюн студентле бла тюбешиу Архитектура, къурулуш эм дизайн институтда да баргъанды.  Аны таматасы Толя Хежев бюгюнлюкде вуз архитектура, къурулуш эм кийим тикген дизайнерлени, багъалы темирледен эм башха затладан абериле ишлеген къол усталаны, дагъыда кёп усталыкъладан иги специалистлени хазырлагъанын айтханды. Ол себепден ала республикадан тышында башха регионлада да урунургъа онг табадыла.  Институт отуздан артыкъ предприятие бла байламлыкъ жюрютгенин, ала амал болуп иш бла жалчытмай къоймагъанларын да энчи чертирчады.

- Бусагъатда республикада къурулуш бёлюм тири айный барады. Жыл сайын 500 минг квадрат метр жашау журт салынады. Аллай жетишимлеге Союзну заманында окъуна жеталмагъандыла. Болсада хар бёлюмдеча жангы излемлеге келишген специалистле керек болгъанлай турадыла. Ол себепден къурулушчула, башха регионлагъа да бармай, кесибизде иш къоллу болаллыкъдыла, - дегенди КъМР-ни къурулуш эмда жашау журт-коммунал мюлк министрини орунбасары, баш архитектор Астемир Унажоков.

Жыйылыуда «Малка», «Знак», «Лифт-Профи», «ОРНАМЕНТ», «ETE-CHILDREN», «URUSOV GROUP» биригиулени, «Shorman group» студияны, «ВоенТекстильПром» эм «Авангард» тигиучю фабрикаланы таматалары къаллай устала изленнгенлерин эм карьера жаны бла берилген онгланы юсюнден да билдиргендиле. Сынамлы предпринимательле жетишимли бизнесменле болурча бир къауум магъаналы тасхаланы да ачыкълагъандыла.

Курданланы Сулейман.