РФ-ни ФСИН-ини КъМР-де Управлениясыны бахчаларында жаз башы кезиулю ишле башланнгандыла.  Бюгюнлюкде 350 гектарда урлукъ салыннганды, - деп билдиргендиле    ведомствону пресс-службасындан.

Бешинчи номерли колония-поселенияда олтургъанла ишлейдиле.  Ала жазлыкъ арпа, нартюх эм будай салгъандыла. Жууукъ заманда чеплеу салып башларыкъдыла. Ишлени тамамларча энчи техника эм оборудование да барды.

ФСКН-ни таматасыны орунбасары Аслан Абазов айтханнга кёре, ведомство эл мюлк продукция бла кесин тынгылы жалчытырчады. Анга регионну уголовный-толтуруучу системасы аслам эс  бурады.

Бир тюрлю сылтау бла олтургъанла  училищеде окъуп жерчилик бла байламлы билимлерин ёсдюредиле эм транспортну жюрютюрге юйренедиле. 
Сабанлыкъланы уллулугъу 600 гектаргъа жетеди. Кюз артында 1000 тонна тирлик жыйыллыкъды. Ол тюзетиучю учрежденияладан сора да, келишим бла   организацялагъа эм энчи иелилеге сатылырча да мадар этилликди.

Саулай алып айтханда, быйыл Къабарты-Малкъарны мюлклерини барында да, тахта кёгетледен,  былтырдача, 17 минг гектардан аслам орнатыр мурат этиледи.  Бюгюнлюкде мюлкледе жашил къудору, быхы, сохан, чюгюндюр, хобуста, турма, томат, наша эм башха затла салып кюрешедиле. Эл мюлк производительле тынгылы урлукъ саладыла эм бийик технологияланы хайырланадыла. 

Былтыр жерчиликде уруннганла, тахта кёгетлени бар тюрлюсюнден да 470,1 минг тонна жыйгъандыла. Ол буруннгу жылдан эсе 103,6 процентге кёпдю. Тирликни танг кесеги неда 65 проценти биригиулеге жетеди, энчи иелиле да 35 процент чакълысын ёсдюредиле.

Бизни корр.