Кёп болмай Регионнга оноу этиу жаны бла  араны (ЦУР)  таматасыны къуллугъун толтургъан   Мадина Кадыкоева Радио России «Кабардино-Балкария» станцияны  тюзюнлей эфиринде  быйыл январьда этилген ишлени юслеринден билдиргенди.  
 Ол айтханнга кёре, бир айны ичинде ЦУР-ну специалистлери жерлешлерибизни  900-ден аслам тилеклерине  къарагъандыла.   Аланы кёбюсю социал къоруулау, жашау журт-коммунал мюлк, саулукъ сакълау, жолла эм къоркъуусузлукъ бла байламлы болгъандыла. Ол санда  къыралда осал эпидемия болум   эм жангы   омикрон-штамм бла байламлы  Саулукъ сакълау министерствогъа иги кесек соруу келгенди.   
Эсге сала айтсакъ, кёп болмай КъМР-ни Башчысы ЦУР-ну жокълагъанда, саулукъ сакълау жаны бла этилген тилеклени бла тарыгъыуланы юслеринден  да билирге излегенди. Аны бла бирге  адамланы жарсыуларына терк халда эс бёлюрге кереклисин эсгертгенди. 
Тюзюнлей эфирде республикада толтуруучу власть органланы  бла жер-жерли самоуправление органларыны   ишлерин да  эсеплегендиле. Алагъа  кёре   рейтинг  къуралады. Анга жамауатха  берилген жууапла,  бёлюннген заман, тынгылы толтуруу эм башха шартла киредиле.  
Алай бла регион органлагъа берилген  сорууланы асламысы Салукъ сакълау   эмда   Жарыкъландырыу, илму эмда жаш тёлюню ишлери жаны бла министерстволагъады.  Экинчи тизмеде КъМР-ни Транспорт эмда жол мюлк,  Къурулуш эмда жашау журт –коммунал мюлк министерстволадыла. Жер-жерли самоуправление органланы юслеринден  айтханда, Чегем районну администрациясы беш айны ичинде биринчи жерни алгъанлай турады.  Аны ызындан Урван бла Прохладна районла барадыла. 

Магометланы 
Сулейман.